No mucho dia pasa, tabata tin clausura di e proyecto di digitalisacion di e archivonan di nos heroe nacional Boy Ecury, cu a tuma luga dene parke net p’ariba di Julianaschool, cu un presentacion.
Durante di e presentacion aki por a nota un monumento hopi sobresaliente cu ta ilustra e mapa di Aruba y un esfera gigantesco cu ta wordo carga pa awa. Awe nos a papia cu e creador di e monumento, dedica na Status Aparte di Aruba, sr. Albert de Veer, kende ta un dokter retira y actualmente e ta director di e proyecto cu a haci Boy Ecury Park y cu ta haciendo condominium Coral Shell.
E ta conta cu e tabata tin cuater aña ta cana cu e idea di pone un bala of un esfera y haci un monumento pa Status Aparte y dia 1 di Januari 1986.
Si wak’e, tin cu cana y tende cu e bala cu ta lora den awa, ta para riba e isla di Aruba. Esey ta un mapa cu a saca for di Google Earth Satelite Image. Ta un replica di e mapa di Aruba y por wak hopi detaye riba e mapa. Por mira Eagle Beach, Baby Beach, Rodger Beach. E ta un replica cu tin 14 meter di largo pa 4.5 meter di hancho. Por mira detaye riba e mapa aki.
E bala ta nifica e pueblo di Aruba ta duna e populacion turistico di mundo un bon bini. E base di e bala ta cinco ton y e bala mes ta un esfera di graniet preto, cu ta 15 ton. E ta lora den un pomp di 8 horsepower. Tin cu drecha algun cos pa e awa no sali p’afo, pero ta prome biaha cu a purba esaki. Awor aki tin cu cambia e pomp pa haci’e mas poderoso.
E isla di Aruba ta magnifica, caminda cu un persona por cana riba dje. Riba e esfera por mira e isla di Aruba magnifica. Y mester subi e bandanan cu glas pa e awa no sali afo. E lo bira un atraccion turistico y pa e Arubianonan mes. E monumento no ta perfecto ainda. De Veer gusta mustra loke cu tin.
Pa awor aki ta haci un tryout di cende di 5’or di atardi pa 7’or di anochi. Despues wak cuanto coriente e ta consumi, cuanto awa tin mester. Mester haci mas investigacion con e ta traha. Si por lag’e cendi tur ora. Ta depende di hopi detaye.
Ya caba nos por bisa cu e monumento aki ta uno impresionante, cu lo yama atencion di nos bihsitantenan tanto local como internacional. Awo ta keda pa caba di perfeccion’e, pa asina e mira luz di dia, un proyecto cu a cuminsa den mente di un persona cu sigur, tin Aruba na su curazon.
