Awe miembro di fraccion di RAIZ, parlamentario drs. Misha Raymond a manda un carta n’e presidente di Parlamento, mr. Edgard Vrolijk, cuestionando su forma di proceder den parlamento riba e Ontwerp-Landsverordening Openstelling Huwelijk. E ta indica cu den su carta di dia 19 di maart 2024, Vrolijk a skirbi como Presidente di Parlamento, cu e ta desea pa spera e reunionnan di comision cu miembro Darlaine Guedez-Erasmus (MEP) kier atende prome cu yama un reunion publico pa trata e Ontwerp-Landsverordening Openstelling Huwelijk.
E parlamentario ta continua: “Basta dia pasa, na november, bo tambe a indica cu bo ta spera p’e reunionnan di comision di Guedez-Erasmus, pero n’e momento aya cu un termino rasonabel, te cu dia 31 di januari 2024. N’e momento ey, bo a bisa cu e maneho di e Ontwerp-Landsverordening lo tuma luga durante e prome siman di februari 2024. Awo nos ya a pasa mas cu un luna y mey.”
“Den e carta di dia 19 di maart 2024, bo no a indica un termino pa yama e reunionnan di comision y laga esaki completo n’e deseo di Guedez-Erasmus. Den e carta di Guedez-Erasmus di dia 21 di februari 2024, el a laga sa explicitamente habri e cantidad di reunion di e comision desea. Dia 29 di februari, Guedez-Erasmus a presidi un reunion di comision (cu e fundacion ADRA) caminda e miembro Aquanette Gunn a pidi e calendario mas actual di e reunion di comision cu e tema aki como punto di agenda. Mi a sostene e peticion aki. Guedez-Erasmus a bisa cu e lo manda e lista aki, sinembargo, te awe no a manda e lista.”
Mas leu Misha Raymond (RAIZ) ta sigui skirbi cu “Ademas, Guedez-Erasmus, for di e fecha di su carta (y for di mi peticion) te awe a yama solamente dos reunion di comision, di cual un so a tuma luga. E ritmo na cual e reunion di comision ta yama y tuma luga, ta indica un accion delibera di pospone. Ta obvio cu e carta di dia 19 di maart aki y e carta di Guedez-Erasmus di dia 21 di februari 2024, cu no tin confiansa cu e intension ta p’e reunion publico tuma luga riba un termino cortico.
Te awe, bo no a cumpli cu bo promesa den e proceso aki, bo a spera casi un luna pa duna un reaccion na un peticion rasonabel, bo a rechasa e peticion rasonabel y te awe bo no a duna un perspectiva di un maneho oportuno di e proyecto di iniciativa. Mesora cu si, e interesnan di partido a bira conoci, nos mester priorisa interes general.
Pa clarifica, mi ta ripiti cu cada Miembro di Parlamento por vota riba un tema sin ningun restriccion y e carta aki no ta tocante esey. Pero, ta trata di evita cu e presidencia di Parlamento di Aruba ta uza pa pospone e maneho di un proyecto di iniciativa pa sirbi un interes partidista. Esaki no ta un comportacion digno di un presidente. Mi lo spera, pues, cu bo no lo participa den esaki!”
Mas na final, Misha Raymond ta bisa Edgard Vrolijk cu “Tuma na cuenta e importancia di un bon funcionamento di Parlamento di Aruba y e cumplimento di e responsabilidadnan cu nos tin como representantenan di pueblo y co-legislador, mi ta pidi bo p’e ultimo biaha, pa establece un fecha p’e maneho di e Ontwerp-Landsverordening Openstelling Huwelijk y p’e reunion publico tuma luga riba un termino corto. Despues di establece un fecha p’e maneho, e otro reunion di comision desea por tuma luga, pero sin tarda.
E otro partnernan interesa cu ta considera e topico importante lo coopera cu nan presencia na tempo, manera a sosode mas biaha cu otro proyecto di ley. Mirando e desaroyo di e proceso te awe, bo promesa anterior, e accionnan di pospone y e tempo adicional ofreci te awe, mi ta considera e peticion aki un peticion rasonabel y final. Mi tin confiansa cu mi a mantene bo suficientemente informa cu esaki,” e parlamentario a termina bisando den e carta manda p’e Presidente di Parlamento.
