Manera 24ora.com a informa den forma exclusivo ayera nochi, mando policial a duna ordo na polisnan pa NO actua durante e supuesto Toque de Queda anuncia pa Minister Presidente mr. Evelyn Wever-Croes. Awe mainta vocero di Polis, Lito Lacle, a confirma cu no a detene ningun hende awe marduga pa motibo di “avondklok”.
Vocero di Ministerio Publico, Ann Angela, a duna di conoce cu nan ta haya cu no tin suficiente base legal pa boet hende den e avondklok actual bao di e circumstancianan di awor (y cu ta otro cu esunnan di biaha pasa). Pa e motibo ey Fiscal no ta mira motibo pa tuma un medida asina drastico.
Con lo sigui, no ta conoci ainda. Pasobra e curcumstancia cu no tabatin awe marduga, lo no tin mañan tampoco, pues ta duda cu husticia lo sigui e ordo di Gobierno. Ta parce cu Crisisteam a tuma un decision nan so, sin verifica cu esunnan cu tin e poder pa tuma tal decision. Consecuentemente Fiscal a mustra Gobierno cu decisionnan penal asina den cual ta sea kita libertad di un ciudadanonan of ta duna multa, no ta keda na Crisisteam, sino mas bien na Procurador General of Fiscal Mayor, cu despues lo mester defende nan decision dilanti un hues. Ta parce cu tur esunnan deteni, 8 persona, riba e prome dia, lo no haya multa tampoco.
