Durante un reunion publico den Parlamento di Aruba, Minister mr. Xiomara Maduro a haci uzo di e oportunidad pa gradici parlamentario mr. Juan Ady Thijsen pa su compañerismo como colega politico y su contribucion na politica di nos pais pa medio di parlamento.
Parlamentario Juan Ady Thijsen ta un politico versa y cu experiencia amplio cu hopi por a siña di dje. Politica no ta facil y a pesar cu tin bes tin discusion riba diferencianan, semper na final ta keda bon cu otro y hopi bes Ady a haci un trabao como brug entre e diferente polonan politico.
Juan Ady Thijsen a despedi di Parlamento y ta bay pa un otro reto, un otro funcion importante den politica. Minister Xiomara Maduro a desea Juan Ady Thijsen hopi exito den su funcion nobo y ta conta cu semper e lo sigui tey pa duna su bon consehonan.
