Durante e ultimo lunanan a completa varios trabou preparatorio pa cu e plan pa revitalisacion di Oranjestad. Minister di Asuntonan Economico, Comunicacion y Desaroyo Sostenibel, Geoffrey Wever, a reuni cu varios stakeholder den e fase preparatorio aki pa por a haya un bista amplio di e necesidadnan actual y tambe tuma inventario di rekisitonan (legal, comercial, infrastructura etc.) pa por logra revitalisa Aruba su centro di ciudad.
Durante di e prome reunion di trabou diamars dia 5 di juli ultimo, a tuma luga e firmamento oficial entre Ministerio di Asunto Economico, Comunicacion y Desaroyo Sostenibel y e compania Office for Infrastructure & Architecture VBA.
Den cuadro di e plan pa revitalisation di Oranjestad, lo ta importante pa por visualisa diseño pa asina planifica miho. Arkitecto Raffy Kock, propietario di O4IA, a wordo acerca mirando su conocemento y experiencia existente den proyecto di e indole aki. O4IA, lo tin e tarea principal pa traduci e vision den un plan y diseño concreto y di balor husto cu por ehecut’e na un forma realistico.
“Nos lo mester accentua loke ta haci centro di ciudad unico, y promove actividad economico nobo pa e area fuera di solamente shopping”, minister Wever ta comenta. Lo sigui tene consulta cu tur stakeholders durante y despues di e proceso aki pa garantisa cu e plan aki por refleha necesidad y deseo di tur cu ta forma parti di nos centro di ciudad y tambe pa tur esnan cu ta bishita.”
“Den e proximo lunanan nos dilanti lo ta moviendo mas cerca pa realisacion di e plan pa revitalisa centro di ciudad y lo keda comparti esaki cu comunidad” – minister Geoffrey Wever.
