Na comienso di aña Joost Meijs cu ta CEO (Chief Executive Officer) actual di Aeropuerto Internacional Reina Beatrix, a indica cu e lo no desea di continua como CEO di aeropuerto. Su persona a informa prensa y Gobierno como accionista tocante su decision, cu e lo desea di bay busca un otro oportunidad otro caminda, di cual Gobierno ta desea Meijs tur clase di exito.
Gobierno como doño di e compania y accionista mayoritario semper a expresa su anhelo pa por apunta un CEO local, e deseo aki ta expresa for di algun aña caba. Na e momento aki tin un acuerdo vigente pa 20 aña cu Royal Schiphol Group pa opera e aeropuerto di Aruba, durante e 20 aña aki Aruba nunca a apunta un CEO local.
E minister for di dos aña pasa caba a expresa cu a yega e momento pa despues di un relacion di 20 aña cu Royal Schiphol Group cu e momento oportuno a yega pa Aruba haya su propio CEO cu lo ta na cabes pa maneha Aeropuerto Internacional Reina Beatrix.
Oduber a indica cu awor ta e momento cu e grupo Hulandes mester mustra e boluntad pa apunta e CEO local. E politico a indica cu ta den negociacion cu Royal Schiphol Group mirando cu e contract lo bay vence na aña 2025. Ta haya cu Aruba tin suficiente e profesionalnan cu capacidad y esaki a bin ta demostra na e companianan estatal di Aruba cu ta maneha exitosamente pa e localnan, a bira tempo pa esaki por bira un realidad tambe na Aeropuerto.
A cuminsa sondea candidatonan local pa e funcion di CEO. E mandatario a splica cu ta den deliberacion cu Royal Schiphol Group pa por tene e cuenta cu deseo aki “den forma habri, transparente, y cu tur yiu di tera cu tin deseo pa ocupa e funcion aki, por participa den e proceso aki.”
