“Laga mi cuminsa na bida cu den un estado di derecho, ami como Minister di Husticia por ta den desacuerdo of tin un diferencia di opinion cu Ministerio Publico. Nan ta un instancia independiente, pero no obstante esey Bo por diferencia di opinion cu nan. Y den e caso specifico aki, mi a participa esey na nan tambe”, asina Minister mr. Andin Bikker a anuncia awe durante un conferencia di prensa. El a anuncia esaki despues di hopi critica den comunidad, relaciona cu e decision di Fiscal pa duna un turista Mericano pedofiel un boet den un TOM-Zitting y despues por a bandona nos isla sin problema.
Minister mr. Andin Bikker awor a revisa kico ta den su discrecion pa evita y adresa e situacion aki. Segun e mandatario, e tin un comision cu ta lidera dor di un profesor, cu ta conseha nan riba e codigo di procedimiento penal. Bikker lo pidi e comision un conseho por medio di e “aanwijzingen voor opsporing en vervolging”, cu lo por duna instruccion cu casonan di e indole aki, cu no por manda nan un TOM-zitting.
Mas ainda, Minister Bikker lo purba amplia, den un nota di cambio den e ley, tur esunnan cu tin derecho pa apela un decision asina di Fiscal na Ministerio Publico. Ora Fiscal dicidi cu e no lo persigui un hende y cu e caso lo bay TOM-zitting, pues e persona ta paga un boet y e caso a termina eynan, cu famia of “direct belanghebbende” cu nan tin e derechi pa por apela na Corte Comun di Caribe Hulandes.
Mas leu fundacionnan cu tin den nan statutonan cu nan ta protega derecho di criaturanan, cu nan tambe tin derecho pa apela un decision asina di Fiscal. Minister Bikker awor kier amplia e derecho aki den cual e Ombudsman tambe lo haya e derecho pa apela un decision asina.
Minister di Husticia a splica cu Merca tambe tin un opcion cu, den un caso asina, cu Husticia Mericano por investiga si e sospechoso aki a comete un algo asina na Merca caba den pasado, cu lo por persigui’e toch dor di e acto cu el a comete na Aruba. Den casonan asina lo mester canalisa e proceso aki via Embahada di Hulanda na Washington of Consulado General di Merca staciona na Corsou.
