Hende kier traha, pero mester tin trabao. Tin hende si cu tin cu prepara pa nan por ta cla pa nan por bay eherce un labor den un manera, tanto pa loke ta conocemento, como loke ta e actitud pa loke ta trabao. Ta trabao mester tin pa e hendenan por traha, segun minister Hensley Koeiman.
Awor aki tin basta hende cu a perde trabao. Tabata tin e asunto di Insel Air, cu a cera, tabata tin banconan cu a laga hende bay y tin mas compania, cu den un economia cu ta krimp, tin cierto companianan cu ta cay afo.
E ora ey ta haya cu e parti cu e hendenan aki ta perde trabao y nan no ta stort den e fondo social tampoco. E presion ta bira mas grandi e ora. Awor aki ta masha importante pa Gobierno traha riba crecemento di economia, cu kier men mesora tambe aumenta e cuponan di trabao na Corsou.
Porcentahe di desempleadonan
E porcentahe di esnan cu no tin trabao ta basta halto. E ta den careda di 16% y pa e hobennan ta mucho mas halto, cu ta entre 27 y 30%. E ta demasiado halto y tin cu atende cun’e, pasobra den un comunidad caminda cu hende ta sin trabao, ta sin entrada, e ora bo ta haya cu criminalidad ta subi, pobresa, ta haya violencia relacional tambe ta crece. E ora bo ta haya cu salubridad, despues di tempo ta bay paga tambe, pasobra ora hende ta come no balansa, e ta bay afecta bo salud den futuro.
Stranheronan
No mester tin presion di stranheronan riba e mercado local. Nan tin cu haya permiso y ta gobierno tin cu duna esaki. Si ta haci e trabao bon, ora di duna permiso pa un stranhero, ta ora cu no tin ningun hende local pa haci e trabao. Ta analisa e permisonan cu ta duna y ta prepara hendenan na e momento ey pa nan por bin ocupa den futuro cercano, puestonan di hendenan cu nan permiso ta termina. Tin cu prepara hende pa no tin mester di duna permiso na stranhero cu e localnan mes ta haci.
Departamento cu ta analisa
Ta bezig cu un departamento. Tin e labor force development program. Ta atendiendo den dialogo nacional, hunto cu sindicato, dunadonan di trabao y gobierno pa tin un bista di kico mercado ta rekeri na e momento aki, pero tambe hopi importante pa sa kico e mercado ta bay rekeri aki 6 luna, un aña of aki 2 aña. Tin funcionnan cu ta cambia, tin funcion cu ta stop di existi y tin cu prepara hende cu na momento cu e trabao presenta, nan ta cla pa por asumi e responsabilidad di traha.
Meta
Koeiman a splica cu e meta no ta dificil. Tempo tin hopi reto, pero tin cu trata pa logra cu hendenan ta compronde. Mester di un maneho consistente, un maneho transparente, un maneho tambe cu ta tene cuenta cu realidad. Bo mester ta visionario y tambe dachtkracht, pa pone cosnan tuma luga y percura pa tin confiansa. Confiansa bo ta haya ora bo tin stabilidad y trankilidad en un pais y esey ta masha importante pa demostra esey cu e hendenan sa cu ora ta haci negoshi cu Corsou, por conta cu palabracionnan cu haci y di e forma ey ta garantisa cu e chens di hende bin inverti den Corsou of pa hendenan local mes, inverti, lo crece.
