Ora cu bo ta papia di renobacion di Oranjestad como tambe San Nicolas, ta pone bo corda riba iniciativanan cu tabata tin caba di gobiernonan anterior di otro signatura, pa revitalisa centro di ciudad etc. Tambe tin arkitecto Raffy Kock cu tabata hopi envolvi den loke ta renobacion di Oranjestad, y por mira cu minister di Asuntonan Economico Geoffrey Wever ta parce di ta bayendo e mesun direccion aki dus e pregunta ta si esaki ta algo cu ta parti di e maneho.
E mandatario ta bisa cu e ta kere den continuidad di gobernacion y proyectonan ehecuta cu ta bon, bo ta spera e gobierno cu bini tambe sigui cu e tipo di iniciativanan ey tambe. “Dus nos tin nos mesun vision anto a scoge sr. Raffy Kock pa sigui cu ne door cu e tabata tin experiencia cu gobiernonan anterior. P’esey nos a papia cu ne.”
E mandatario ta señala cu Kock tabata tin caba tur e conocemento necesario y sa di tur loke a bay robes y kico mester bay miho anto ta un persona cu por yuda miho den desaroya e proyectonan cu nan ta haciendo actualmente.
Pa centro di Oranjestad, e mandatario ta spera cu tur gobierno lo por continua den e direccion aki. “Nos tur sa kico e retonan ta y lamentablemente nos no por resolve tur di biaha, pero nos ta resolviendo nan un pa un.”
E Aruba Investment Summitt recientemente organisa na Hulanda e biaha aki ta un di e intentonan aki segun minister Wever pa trece mas hende interesa den Oranjestad, pa bin cu mas horeca den e centro di ciudad tanto pabao y pariba.
E vision ta pa Oranjestad bira un centro culinario y pa e industria creativo florece na San Nicolas por ehempel, tin hopi edificio bashi unda cu diferente partnerships por tuma luga pa bin cu ideanan nobo y haci inversion. “Mi ta kere como pais nos mester wak e periodo mas largo y esey ta parti di nos maneho.”
