Den cuadro di e proceso di revitalisacion di Oranjestad, Gobierno a yega n’e siguiente fase concreto den preparacion pa un parkeergarage central combina cu vivienda y/oficina n’e crusada di John G. Emanstraat y Emmastraat.
Conseho di Minister recientemente a duna aprobacion pa drenta den un “overeenkomst van opdracht” cu MGM Source – Economic Financial Investment Advisory, cu lo ehecuta e estudio di factibilidad financiero y economico p’e proyecto.
E intencion ta pa desaroya un facilidad central di parkeer di aproximadamente 4-5 piso, combina cu 2-3 piso pa vivienda y/oficina. E analisis mester determina, entre otro, e costo indicativo di e proyecto, si e por funciona di forma financieramente sostenibel y auto-suficiente, y cua impacto economico e por genera pa centro di Oranjestad.
“Revitalisa centro di Oranjestad no ta solamente renoba edificio. Nos mester crea e condicionnan pa mas hende por biba, traha, haci negoshi y bishita centro di Oranjestad.
Accesibilidad y parkeer ta parti esencial di esaki. Cu e estudio aki nos ta pone e base tecnico y financiero necesario pa por tuma decisionnan responsabel tocante e siguiente fase
di e proyecto,” Minister di Finansa, Asunto Economico y Sector Primario, Geoffrey Wever a indica.
E proyecto ta conecta directamente cu e direccion di Gobierno pa transforma centro di Oranjestad den un area urbano mas activo, unda vivienda, oficina, horeca, comercio y
servicio publico por funciona hunto. E necesidad pa mas capacidad di parkeer ta aumenta paralelamente cu diferente desaroyo cu ta tumando luga den centro, incluyendo vivienda y concentracion di actividad economico y gubernamental.
Revitalisacion di centro ta un prioridad di Gobierno y ta considera e facilidad di parkeer como infrastructura cu mester bin pa apoya e actividad economico den e area. Despues di un proceso di destaho, cuatro compania ta invita pa presenta nan oferta.
Tres oferta ta ricibi y evalua segun e criterionan determina den e proceso. MGM Source a sali como e oferta economicamente mas bentahoso segun e evaluacion. E estudio lo inclui cinco componente principal: un analisis di demanda pa parkeer, un analisis costo/beneficio, un modelo di explotacion, diferente structura di financiamento y un estudio di impacto economico.
Ademas, diferente scenario pa combinacion di parkeer, vivienda y espacio di oficina lo ta analisa, ya cu e configuracion final di e proyecto ainda no ta determina.
MGM Source ta propone pa, entre otro, inventarisa e desaroyonan residencial y comercial den Caya Betico Croes, Wilhelminastraat, John G. Emanstraat y su alrededor, analisa e situacion actual di parkeer y determina e demanda den futuro.
Un otro elemento importante ta e rol di Renobacion Aruba N.V. Land Aruba ta accionista den e compania y e intencion ta pa Renobacion Aruba N.V. participa den e desaroyo, financiamento y explotacion di e proyecto. E estudio lo analisa tambe e necesidad di capital y e relacion entre aporte di e accionistanan y financiamento externo.
Minister Wever a enfatisa cu firmamento di e acuerdo aki ta marca inicio di e fase di factibilidad, y no ainda un decision final tocante construccion. “Prome cu Gobierno compromete recurso na un proyecto di e escala aki, nos mester sa exactamente cua modelo ta funciona, cua riesgo ta existi, cua inversion ta necesario y con e proyecto por genera balor economico pa centro di Oranjestad. E meta ta pa pasa di idea pa un proyecto fundamenta riba dato, analisis y un modelo financiero solido,” Minister Wever a agrega.
Firmamento oficial di e acuerdo cu MGM Source a tuma luga diamars mainta na Bureau di Minister. Despues di evfirmamento y entrega di e informacion necesario, e estudio ta proyecta pa ta completa dentro di aproximadamente 30 dia.
E iniciativa ta cuadra den e maneho mas amplio pa revitalisa centro di Oranjestad y crea mas espacio pa vivienda, comercio, horeca y inversion. Gobierno a implementa tambe incentivo fiscal pa stimula inversion y renobacion den centro di Oranjestad, como parti di e Programa di Gobernacion AVP-FUTURO 2025-2028.
