Camara di Comercio y Industria Aruba (KvK) a analisa e Plan di Implementacion Strategico di Turismo 2026–2031 (version RD.5) cu Ministerio di Turismo a presenta. KvK ta aprecia cu e plan ta reconoce cu Aruba mester cambia di volumen pa balor, y cu varios punto a wordo adapta compara cu e versionnan anterior.
Sinembargo, KvK ta di opinion cu un maneho nobo di turismo mester enfoca prome riba solucion pa e retonan cu Aruba ta enfrentando, y cu segun KvK ta e consecuencia directo di sobreturismo.
Sobreturismo ta un realidad diario
Tanto habitante como bishitante ta experencia tur dia e presion riba nos isla: playanan cu ta yen, falta di luga di parkeer y un maneho cu no ta suficiente cla riba aspectonan manera UTV. Nos infrastructura, entre otro camindanan, tratamento di awa sushi y produccion di awa y energia, ta sobrecarga. Ademas, tin un cantidad creciente di keho tocante e nivel di servicio cu turistanan ta ricibi tanto den sector turistico como tambe den otro sector. Sin un servicio di calidad halto e reputacion di Aruba como destino exclusivo lo ta na riesgo. Ora cu varios barco crucero ta aden, e fluho di turista ta pone cu Centro di Oranjestad ta bira completamente congestiona y ta stroba e trafico normal.
E solucion sugeri den e plan, pues pa traslada barconan crucero pa San Nicolas, no ta realisabel a corto plaso. E area unda un barco crucero lo por mara ta severamente contamina door di e antiguo refineria (RdA) y e costonan pa sanea e area aki no ta inclui den e plan.
Sector di Airbnb ainda no ta regula
Un otro preocupacion grandi ta cu e sector di vacation rentals (Airbnb) ainda no a wordo regula. Segun e cifranan mas reciente, Aruba tin rond di 4.100 unidad di Airbnb activo: cerca di 11% di e total di cas na Aruba y 25% ta den e area di Noord. Segun un estudio di Economisch Bureau Amsterdam (2023) haci na encargo di Gobierno di Aruba, e sector aki na 2022 ya caba tabata ofrece 7.615 camber pa turista, cu ta mas cu henter sector hotelero.
E crecemento aki ta contribui na e subida di prijs di cas y di material di construccion y ta haci e costo di bida mas halto pa nos hendenan. Un cas mediano ta costa rond di 11 biaha e entrada anual di un famia mediano; cada biaha mas famia local no ta alcansa di cumpra un cas propio.
Menos turista, mas balor
KvK ta di opinion cu mas beneficioso pa tanto e interes economico como e interes di nos pueblo y di nos medio ambiente, si tin un reduccion gradual di e cantidad actual di turista (970.000 turista di cruise y 1,52 miyon turista stayover) pa un nivel mas abao, enfocado mas riba atrae turista di mas balor. Sinembargo e turistanan aki ta bin solamente si e servicio ta optimal, si e playanan no ta yen y si tin luga di parkeer disponibel pa nan.
E cifranan ta sostene e posicion aki. Segun e calculo di KvK, basa riba cifranan di Banco Central di Aruba, pa cada 1 % di crecemento den cantidad di turista, e entradanan real di turismo a crece solamente 1,16 % (2019–2025). Esaki ta bou di e norma minimo di 1,5% cu e plan mes ta indica, y mas abou ainda di e meta di 2,0%. Esey ta nifica cu mas crecemento den cantidad di turista no ta wordo hustifica, ni a base di e indicacionnan di e plan mes.
Aruba a surpasa su capacidad di carga
Segun KvK, Aruba a yega caba na e limite di loke e isla por carga. Durante decadanan crecemento di turismo a sosode principalmente pa medio di mas volumen (mas camber, mas turista y mas trahado di exterior) en bes di mas balor pa cada turista.
Awor cu e poblacion di Aruba ta envehece rapidamente y cu crecemento natural di poblacion a bira negativo, cada camber nobo ta exigi mas inmigracion y cada inmigrante nobo ta exigi un cas mientras cu e mercado di cas ta bou di presion caba.
Mas di 1.850 camber di hotel nobo ta den pipeline, cu lo aumenta e falta di trahado y e presion riba e mercado di cas ainda mas. Un modelo di crecemento cu ta depende di inmigracion no ta sostenibel pa un isla chikito manera Aruba.
KvK ta comparti e punto di bista pa boga pa stop e crecemento den cantidad di bishitante, pa controla e cantidad di barco crucero cu ta yega mesun dia y pa remplasa turistanan cu ta gasta menos pa turistanan cu ta contribui mas.
Mas organo nobo, menos eficiencia
Pa ehecuta e plan, ta propone pa establece mas di seis organo nobo, mientras cu e plan mes ta bisa cu e structura nobo no mester bira un capa adicional di burocracia. KvK ta sumamente skeptico tocante e manera cu diferente instancia di gobierno ta comunica y coordina cu otro. Crea organonan nobo ta haci e cadena di comunicacion mas largo y e responsabilidadnan menos cla. Esaki no ta contribui na un comunicacion, direccion y sigur no un control eficiente.
E plan ta propone entre otro un “National Ocean Rest Day”: un dia pa luna cu actividadnan manera buceo, snorkel y deporte acuatico motorisa ta wordo suspendi den zonanan designa pa duna nos rifnan di coral un dia di descanso. Un dia di descanso no tin ningun efecto sin un control estricto y control ta precisamente un punto unda Aruba mester mehora. Ademas, un dia di descanso no ta resolve e causa di e problema.
Pa proteha nos playanan y nos coral di berdad e presion riba e ecosistema mester baha y esey ta nifica: menos turista.
Turista ta paga mas, pero e cuenta no ta cuadra
Pa financia tur e organonan y programanan aki, e turista lo mester paga un suma considerabel. E plan ta propone un “Resilience Entry Fee” di US$25 y un “Natural Capital Contribution” di US$10 pa bishitante, un aumento di 1% den room tax, fee adicional pa buceo (US$25) y pa participante den tour di UTV y ATV (US$5 pa dia) y pa auto di huur.
Pa un famia di cuater persona, e dos fee fiho so caba ta nifica US$140 extra pa cada biahe. Maske cu e fee aki ta considerabel, e cuadro financiero di e plan no ta cuadra. E plan no ta cubri tur su costo y hopi di e entradanan menciona ta basa riba calculonan. Alabes, e costo di e programa di crucero no ta inclui den e presupuesto di Afl. 584,5 miyon.
Algun di e calculonan aki, por ehempel e cantidad di buceado cu lo paga e fee nobo, ta cuestionabel.
Ademas, Aruba ta conoci caba como un destino (hopi) caro. No ta apropia, y sigur ta un riesgo pa haci un bishita na Aruba mas caro ainda, mientras cu cada biaha tin mas keho tocante un nivel di servicio cu ta bahando. Turista di balor halto ta dispuesto pa paga mas, pero solamente si e calidad cu nan ta ricibi ta coresponde cu e prijs.
Durante e proceso di consulta, KvK a comparti cu Ministerio di Turismo su analisis y recomendacionnan riba e plan. KvK ta keda disponibel pa sigui contribui na un maneho di turismo cu ta pone e calidad di bida di nos pueblo, e calidad di nos producto turistico y e proteccion di nos medio ambiente na prome luga: soluciona e problemanan actual prome cu evalua mas crecemento.
