E agrupacion musical Chicas Gaiteras ta cla pa biaha pa Hulanda caminda nan lo presenta un concierto special pa e publico local, studiantenan, y e comunidad di Rubiano- y Antianonan den exterior. E concierto lo tuma luga dia 11 di october na Hoftheater na Raalte, como parti di e celebracion di nan 40 aniversario.
Na nan salida na aeropuerto, diferente integrante, fanatico, y representante di e fundacion a comparti nan emocion y preparacion pa e biahe aki. Den un ambiente yen di entusiasmo y nostalgia na Aeropuerto Internacional Reina Beatrix, e agrupacion musical renombra Chicas Gaiteras a sali rumbo pa Hulanda. E grupo ta preparando pa duna un concierto unico e diadomingo aki, 11 di october, na Hoftheater na Raalte, marcando un milestone historico den e celebracion di nan 40 aniversario.
E iniciativa pa e gira aki a nace despues di e exito rotundo di nan concierto na Aruba aña pasa. Debi na e gran demanda y e peticion di e comunidad di Rubiano, Antiano- y studiantenan biba na Hulanda, e fundacion y e agrupacion a uni forza pa haci e soño aki un realidad.
Niurca Kock a expresa cu despues di lunanan di preparacion intensivo y ensayo, e dia a yega finalmente. “Nos ta sinti nos mes ful prepara pa hiba e calor di Aruba, e ambiente di Pasco, y un mensahe di amor y paz pa henter Hulanda”, Kock a declara. El a recorda e publico cu pa facilidad di e bishitantenan, lo tin un servicio di shuttle specialmente organisa cu lo busca hende na e stacion pa hiba nan te na e teater.
Di su parti, e cantante Nicole Martines-de Kort a duna un demostracion acapella di e clasico “Wela”, ilustrando e repertorio emocional cu ta spera e publico. “Despues di varios entrenamento intensivo, nos ta cla pa trece e mesun calidad di show cu nos a duna na Aruba,” Martines de Kort a bisa, mientras el a extende un invitacion di curason pa tur compatriota den exterior bin celebra hunto.
E emocion tambe tabata palpabel entre e fanaticonan cu a biaha for di Hulanda pa acompaña e grupo. Gloria Maduro, kende ta biba na Hulanda pero tabata di bishita na Aruba, a conta cu el a haci sigur di reserva su carchinan un dia prome cu nan a sali na benta. “Ta un cos unico pa por mira nan presenta aya na Hulanda; e momento ta awo”, el a expresa emociona.
Presidente di e Fundacion, Gilmar Croes, a splica cu e gira aki ta habri e celebracionnan di e di 40 aniversario di e grupo pa 2025. Croes a resalta e balor simbolico di e concierto aki, ya cu e ta reuni integrantenan cu a cuminsa for di e prome dianan di Chicas Gaiteras. “Nos ta bay trece un repertorio profundo cu ta mescla alegria, tristeza y hopi emoshon cu cancionnan emblematico manera ‘Wela’ y ‘Cariño’,” el a agrega.
Finalmente, Gina Maduro a confirma cu e planificacion aki tabata tumando luga desde aña pasa cu un entrenamiento extenso pa garantisa un spectaculo di un nivel haltisimo. “Nos kier invita tur studiantenan y e comunidad caribense na Hulanda pa no perde e gran concierto aki dia 11 di october”, el a conclui.
