Den e mundo moderno tin diferente tipo di alternativa pa placa tradicional cu nos ta custuma cu ne. Tambe mundo completo ta padece di diferente forma di pago digital pa asina facilita transaccionnan realisa online. Un mercado cu sigur ta hayando mas y mas atencion rond mundo ta e mercado di criptomoneda. Esaki ta un moneda digital den cual e transaccionnan ta verifica y e registronan manteni pa un sistema descentralisa cu ta uza criptografia, na luga di un autoridad centralisa.
Un di e criptomonedanan mas famoso y sigur mas ‘lucrativo’ awendia ta Bitcoin. No obstante, na Aruba no ta posibel pa inverti den Bitcoin y tampoco ta posibel pa, por ehempel, realisa un transaccion online cu Paypal, esta un manera mucho mas facil pa haci pago online, como tambe reconoci y realisabel rond mundo.
Riba e hecho aki, e actual minister di Asunto Economico, Comunicacion y Desaroyo Sostenibel, mr. Geoffrey Wever, a splica cu esaki ta netamente locual el a bin ta menciona desde un principio, esta pa profundisa den e mercado di capital. E ultimo aki ta referi na cu mester percura cu tin otro tipo di instrumento financiero accesibel pa tur nos hendenan, segun e minister a splica.
Pa loke ta trata Bitcoin, Wever a bisa cu segun e den regulacion esaki mester por bira un posibilidad di inversion pa nos hendenan. Segun el a sigui splica, cada persona mester por tin e libertad pa inverti na e forma cu e mes ta kere cu ta responsabel. E pensamento ta igual pa Paypal y kier a clarifica cu no ta Banco Central ta prohibi esaki, sino cu Paypal no tabata haya Aruba un mercado interesante y aworaki ta keda na gobierno pa reinicia e combersacion cu nan y sino busca un otro plataforma digital pa haci uzo di dje. Tur esakinan ta den ‘pipeline’ segun Wever pa asina trece cambio den e sistema financiero di nos pais.
Pa un relato mas amplio, lesa edicion di TREMPAN mañan.
