Riba e tema specifico di aumento di abuso di mucha na Aruba, nos a puntra minister-president Evelyn Wever-Croes dialuna mainta durante su conferencia di prensa si tin un estudio haci con tur e ultimo añanan cu gobierno ta haciendo varios esfuerso pa mitiga, conscientisa, con esaki ta dunando su frutonan. E pregunta ta si ta mirando rebaho den casonan di abuso di mucha na Aruba of si ainda no tin un estudio haci riba e tema aki.
Tin diferente estudio y analisis haci, loke bo no ta weita ta cu cifranan bahando, “pero esey nos tabata sa tambe na principio,” segun minister Wever-Croes. E mandatario ta enfatisa cu na momento bo cuminsa papia di dje so caba bo ta haya un cantidad di caso adicional. Tempo cu sra. Lisette Gomez a cuminsa na aña 2010 cu su trabaonan, e tema tabata ainda hopi taboo, no tabata mag di papia riba dje.
Na momento cu a cuminsa papia mas di e tema, por a ripara cu mas hende a bini dilanti y comparti nan experiencia. “Di 2010 pa awor akinan, diescuater aña mas leu, pero ainda bo ta mira esey”, segun prome minister. E abuso no a bira menos, y gobierno no ta haya cu a yega n’e nivel di conscientisacion cu ta desea.
E mandatario ta enfatisa cu bo por hisa castigo, percura pa tin miho recherche, miho psicologo y tur esey, pero si cifranan no ta afecta di esaki cu no ta por ehempel 99 mas y bira 90, 80, y sigui baha, e no ta duna su resultado manera desea cu e conscientisacion mester sigui. Gobierno ta haci su parti, profesionalnan ta sigui haci nan parti pero aworaki mester enfoca mas riba famia. “Anto e ora nos ta spera cu berdad por mira cu esaki ta cuminsa baha. E ta mescos riba e otro paisnan tambe, e no ta un fenomeno cu ta birando menos.”
