Contrario na e custumber di hopi decada, cu e temporada halto di turismo, conoci como “high season”, ta cuminsa despues di Pasco di nacemento y ta sigui te cu Semana Santa na april…e aña aki parce cu tin un cambio. Awe diasabra Minister di Turismo y Salud Publico, Dangui Oduber, a anuncia riba su pagina di Facebook cu “E weekend aki caba Aruba a cuminsa drenta High Season ricibiendo mas cu 10.000 turista”.
Bisando esaki, e mandatario, cu tin un bista global di henter turismo di nos isla, pues no solamente yegada na aeropuerto, sino waf tambe, ta confirma e tendencia di crecemento pisa den nos turismo. E siman aki caba Aruba Airport Authority a menciona cu nan so ta premira un crecemento di dos cifra den cantidad di pasahero pa nos isla. Aeropuerto ta keda e porta principal di entrada di mayoria turista, tanto esunnan cu ta huur camber den hotel, time-share, keda den condominio of loke ta asina popular awo…huur un cas via Air BnB.
Si Aruba mantene e “trend” aki, esta di move nos temporada halto for di fin di december pa fin di october – inicio di november caba, ta nifica cu e cifranan di e aña aki por subi mas ainda. Tur esaki mientras cu aerolineanan ta informando tras di otro di aumento den cantidad di vuelo, bin cu avionnan mas grandi cu mas capacidad y sin lubida e rutanan nobo pa nos isla.
Spera cu tur departamento y organisacion cu ta traha na aeropuerto ta cla pa e cantidad di pasaheronan aki yegando. Mester menciona cu Migracion Aruba ta haciendo hopi esfuerso, cu e empleadonan limita cu nan tin, pa procesa pasaheronan mas lihe posibel. A habri y promove mas uzo di E-gates pa por keda cla mas lihe cu vuelonan, specialmente esunnan di destinacionnan di risico.
Yegada di hopi vuelo pareu, por traduci (tin ora) den retraso pa salida pasobra tanten cu no caba di procesa henter e avion, no ta permiti pa e vuelo sali. Specialmente vuelonan di Latino America, ta wanta nan den caso cu Migracion nenga entrada di un of mas pasahero, cu mester regresa nan pais riba e mesun avion cu nan a yega.
Den e mesun rosea, parce cu Gobierno di Aruba ta trahando pa hinca e ED-Card den un ley, cu ta haci su uzo obligatorio. Durante pandemia a hacie asina caba, uzando e ley di emergencia. Pero awo cu pandemia a pasa, aunke algun aerolinea ta aplic’e, toch tin algun cu ta nenga di incluie den nan protocol pasobra toch e no ta obligatorio.
Asina cu aproba e ley aki, programa pa sosode e aña aki ainda prome cu e temporada mas druk, lo inclui algun pregunta adicional pa stranheronan, yenamento di entrada y prueba cu tin suficiente fondo pa por gasta na Aruba, lo facilita e proceso di entrada mas ainda. Cu e ED-card trahando eficientemente, e pasahero lo por pasa trankilamente na E-gates, mientras cu e ambtenaarnan di Migracion lo supervisa e proceso online, hasta for di prome cu e pasahero yega nos isla. Pasobra mester yena e ED-Card tres dia prome cu bula pa Aruba, pues ta duna Migracion tempo pa haci un “background check”.
