Tin un estilo nobo di transporte recientemente tumando over nos isla, mas tanto den loke ta area turistico y toch awor tambe den algun bario. Ta trata aki di step electrico, pa cual Departamento di Impuesto (DIMP) no a duna plach’i number, ni tampoco a conseha pa nan haya esaki.
E motibo ta pasobra no ta considera e step electrico aki manera un vehiculo di motor. No ta considera e motor cu nan tin manera uno cu ta brinda un velocidad aproba pa bay ariba careteranan publico.
Sin embargo, bo ta ripara toch tin algun hende ta subi caminda cu nan.
“Nan no ta aproba pa subi caretera publico,” segun directora di DIMP mr. Luenne Gomez-Pieters. Tin algun step electrico cu ta bay na 80km pasando asina un cierto volumen di siguridad mescos cualkier otro vehiculo. “Akinan lo mester tuma contacto cu nos, y tambe DTP, DTI, pa por wak ki tipo di vehiculo nan ta y si ta un vehiculo cu mester carga un plachi di number.”
