E asunto di legalisacion di Cannabis Medicinal a lanta basta stof den comunidad. Fuera di esey, tin algun cos cu a menciona cu mester claridad riba dje.
Minister di Salubridad Publico, Dangui Oduber a menciona con e proceso a cuminsa, unda nan ta na e momentonan aki y kico ta e fasenan cu ta sigui.
No ta trata cambio di opiumverordening, sino landsverordening geneesmiddelen y verdovende middelen.
E proceso a cuminsa na momento cu tabata tin cambio di gobierno. Tres partido a firma un acuerdo di gobernacion, unda cu lo explora e posibilidadnan di legalisacion di Cannabis Medicinal. A institui un comision cu tabata consisti di diferente representante di diferente ministerio, pa atende cu esaki.
Varios investigacion a wordo haci. E proceso a tuma un aña. No ta cuestion cu na un manera iresponsabel ta cuminsa e proceso aki. Ainda tin un trayecto cu tin cu encamina. Despues cu e comision aki a haci su tareanan, a bin cu diferente sugerencia dilanti con pa atende cu e asunto aki, na un manera responsabel.
A busca tambe conseho di inspectie der geneesmiddelen, con ta atende cu e cuestion di legalisacion di Cannabis Medicinal. Una bes cu a haya e conseho di e comision, a haya conseho di Inspectie der Geneesmiddelen, a tuma e desicion pa encamina e proceso.
Na e momentonan aki, pa kita tur duda for di mesa, si ta uzo medicinal of uzo recreacional, y a pone enfasis riba dje.
Den ningun momento, e minister, como responsabel pa salubridad publico, ta para pa uzo recreacional.
E ta e minister cu ta atende cu adictonan tambe. E sa y ta hopi conciente tambe kico ta e consecuencianan na momento cu bo tin un persona cu ta haci uzo di Cannabis recreacional. Hopi ta e adictonan cu a cuminsa cu Cannabis y a caba haciendo uzo di substancianan hopi mas fuerte. E minister ta hopi conciente y responsabel. E ta tata di dos yiu tambe y no kier lanta den un comunidad caminda cu ta promove e uzo di Cannabis Recreacional.
Loke si e ta kere aden ta e uzo medicinal y a bisa cu lo bay introduci.
Pesey a bisa riba un adaptacion den e landsverordening geneesmiddelen, pasobra lo adapta e ley y merk aan e CBD Oil, e azeta,e CBD capsule y CBD creme, cu tin un dosis hopi abao di THC aden.
Mester cambia e ley pa merk aan e productonan aki como suplemento. Na e momentonan aki, benta di e productonan aki ta ilegal.
No por bende e productonan aki riba mercado y esey ta bay legalisa. Bo por importa e productonan aki cu ta wordo getest na laboratorionan den exterior, sea ta na Merca, sea ta na Canada, sea ta na Inglatera, sea ta na Colombia mes, lo importa y lo duna como gobierno importvergunning, mara na diferente condicion estricto cu e importador mester cumpli cun’e.
Obviamente e productonan mester wordo getest prome cu e ta importa. Una bes cu import’e lo distrui esaki entre e botica y tiendanan cu ta bende suplemento. Esey ta e fase cu ta aden awor aki.
Berdad a bisa cu ta considerando tambe pa trece cambio den e landsverordening verdovende middelen, esey ta Cannabis Medicinal pa merk’e aan como un remedi.
Tur e productonan aki ta deriva di Cannabis. Den ningun momento ta papiando di e yerba. Ta papiando di azeta cu dosis un tiki mas halto di THC. No a yega eynan ainda, pasobra kier introduci esaki. Ta algo cu nunca antes a haci na Aruba. Otro paisnan ta cana dilanti. P’esey no ta tene consideracion pasobra otro paisnan ta cana dilanti y nos tin cu core tuma desicionnan pura pa yega eynan.
Pesey ta cuminsa cu CBD oil, CBD Capsules y creme. Una bes e trayecto di ley aki keda cla, y haya aprobacion di parlamento, pasobra e tin cu cana su caminda.
E tin cu bay Raad van Advies, tin cu contesta nan, tin cu bay parlamento, tin cu bay sala pa votacion y una bes esaki bira un realidad y wak kico ta e resultado den comunidad, por sigui pensa riba e otro trayecto.
