Aruba ta den pleno preparacion pa ricibi e prome lote di vacuna. Minister Dangui Oduber a anuncia cu dia 15 februari 2021 e prome vacunanan lo yega. E prome vacunanan cu Aruba lo ricibi ta di Pfizer, cu a resulta, te na e momentonan aki, un di esunnan mas efectivo. Mester warda e vacuna aki na un temperatura di -80 grado celcius y pa cu esaki RIVM tawata na Aruba pa controla e freezernan.
Banda di esaki RIVM a controla nos plan di ehecucion y tambe a bishita tur ‘priklocaties’. “Nos ta hopi satisfecho cu e resultado di e e evaluacion cu a wordo haci pa RIVM. Nan a keda impresiona con Aruba ta preparando pa haya e prome lote di vacunanan”, asina Minister Dangui Oduber a expresa.
Lo tin 4 localidad unda pa vacuna:
- Club Don Bosco na Noord
- JFK Education Center na Oranjestad
- Centro Libertador Betico Croes na Santa Cruz
- Santa Theresita Center na San Nicolas
E 4 localidadnan aki lo activa na momento cu cuminsa cu vacunacion di masa y lo anuncia e fechanan pa cu esakinan. Conforme e strategia y plan di e programa di vacuna, e dunadonan di cuido, esta esunnan cu ta biba den casnan di cuido y esunnan riba 60 aña ta bin na remarke prome pa haya vacuna. Despues ta sigui cu tur e otro gruponan.
Te cu awe a duna mas di 128 miyon shots di e vacuna. E ta dunando resultadonan hopi positivo den sentido cu tin menos hospitalisacion. “Nos ta convenci cu na Aruba tambe e vacuna lo duna nos e resultado cu nos ta buscando pa por salba mas bida, evita cu ta hospitalisa mas hende y pa nos por bolbe na normalidad pa por sigui nos recuperacion economico”, segun Minister Dangui Oduber, encarga cu maneho di salud publico riba nos isla.
Desde 1 februari tur esunnan cu tin smartphone y kier haya e vacuna, por cuminsa pre registra via e Aruba Health App. Por download esaki via Google Playstore of via Apple App Store. Asina cu a download e app, por cuminsa pre registra pa haya e vacuna. Dia pa dia e interes ta creciendo y ya caba tin algun mil persona a pre registra via e Aruba Health App.
Esunnan cu NO tin un smartphone por cuminsa registra entrante dia 8 di februari 2021 den oranan di atardi na tur e MFA nan na Aruba. Y desde diamars dia 9 di februari, e orario ta bira tur dia entre 7:30am y 4:30pm. Na tur MFA lo tin personal di DVG presente pa duna e asistencia necesario pa guia tur esunnan cu kier registra.
Aruba a demostra di ta pionero na mundo haciendo uzo di nos app, pa no solamente maneha e PCR test pa local y turista, sino awor tambe pa uz’e pa registracion di vacuna, registra inventario di e vacuna y monitor temperatura di e freerernan. Internacionalmente ta reconoce Aruba pa nos innovacion y como trendsetter den tur loke ta haciendo pa maneha Covid-19.
“Ta hopi importante pa nos tur aki na Aruba wordo vacuna pa nos por proteha nos mes, cuida nos mes y crea e inmunidad hunto pa nos por laga Covid-19 tras di lomba”, di acuerdo cu Minister Dangui Oduber. “Nos tur tin e deseo pa por bolbe na normalidad y e vacuna sigur ta un herment pa yuda nos logra esey. Mester recupera nos turismo, nos economia y nos pais”, Minister Oduber a termina bisando. “Ban nos tur uni den e causa aki y stimula y conseha tur otro pa tuma e vacuna pa por cuida nos mes. Ban demostra union, ban demostra nos humanidad pa por surpasa e pandemia aki”.
