Siman pasa, durante celebracion di Dia di Piscado, Minister di Naturalesa, Ursell Arends, a tuma e oportunidad pa reconoce seis piscado cu ta contribui grandemente na e maneho di spearfishing cu nan conocemento y experiencia y durante añanan a provee diferente perspectiva riba e arte di pesca.
E piscadonan cu a ricibi un reconocimento special di Gobierno di Aruba ta Derick Quandus, Edward Dirksz, Marvin Thiel, Bogdanovic (Dano) Carolina, Jonathan Koole y Aby Kock. Durante e dia aki a tuma un momento special pa reconoce Victor Tromp cu ta un piscado adulto mayor di 81 aña y cu ainda ta practica e arte di pesca activamente. Victor cu no solamente ta piscado, si no tirado di pisca tambe, ta conta cu durante su trayectoria largo e semper a cuida y proteha piscanan cu ta importante pa nos ecosistema. ‘Shonnan ami a yega, wak pa boso tambe yega!’ El a bisa na tur otro piscadonan presente.
“E ta un orguyo grandi pa nos por a reconoce Aruba su piscadonan cu un detaye chikito gradiciendo nan pa nan aporte na nos industria di pesca”, asina Minister Ursell Arends a enfatisa. Ministerio di Naturalesa ta yama danki tambe na Santa Rosa Aruba pa tur esfuerso pa sigui engrandece e sector di pesca y pa a forma parti di e celebracion di Dia di Piscado.
