No ta un ni dos, sino semanalmente Minister Andin Bikker di Husticia ta duna ordo pa pone ilegalnan deteni, pendiente nan deportacion, bek den libertad.
E casonan ta bira mucho mas serio ora cu e ilegalnan pasa dos dia cera cu nan mester presenta dilanti Hues Comisario, cu ta instrui nan deportacion y ainda toch e mandatario ta laga nan bay den libertad. Tin duda serio cu Corte den Prome Instancia di Aruba ta na altura di e maneho aki y e forma di proceder di e Minister di Husticia nobo.
Warda nos Costa ta haciendo un esfuerso masha grandi pa detene stranheronan cu a opta pa deliberadamente keda ilegal riba nos isla. Mayoria cu nan detene ta pasobra nan a pasa nan dianan di “vakantie” cu 1 of mas aña! Otronan cu a bin Aruba pa vacacion ta haya nan 2 pa 4 aña despues trahando den forma ilegal. Den casonan asina ta bay mesora na deportacion.
Pero kico ta pasando? E comerciante cu a emplea e ilegal, en bes di haya un multa, ta wordo premia pasobra Minister ta yama Warda nos Costa y instrui pa laga e ilegal ey den libertad pasobra e lo regla su papelnan pa haci nan legal. Ta papia di hopi of mas cu 15 illegal sigur cu den corto tempo a wordo laga den libertad siendo illegal pa algun aña caba!!
Di otro banda, a compronde cu e “Chief of Staff” di Ministerio di Husticia, esta mr. Joselin Croes, candidato # 4 riba lista di POR cu a cede su asiento di Parlamento pa e bira Minister Plenipotenciario na Merca despues di mita di e aña aki, tambe a haya autoridad pa yama hefe di Warda nos Costa den nomber di e minister pa laga ilegalnan den libertad.
Esnan deteni ta den e area di hotel trahando, construccion etc. Ta wordo menciona cu basta di ilegalnan cu a recobra nan libertad ta campañadornan di e partido durante ultimo eleccion.
E nacionalidad ta varia. Tin di Haiti, Republica Dominicana y mayoria di Venezuela.
Bo ta tende cu tin hopi illegal na Aruba pero den e caso aki e minister nobo mes ta duna ordo pa libera esnan cu a wordo gara pa Warda Nos Costa.
Ta conoci cu Croes tabatin su mesun bufete di abogacia y tabata representa un cantidad di stranhero na Aruba, tanto den maneho di nan permisonan di estadia y trabou, como tambe pa lantamento di negoshinan riba nos isla. Ta bira masha cuestionabel cu un persona asina ta atende awor cu maneho di permisologia y stranheria.
Fuentenan a sigura nos cu a pone Corte na altura awe cu ilegalnan preso cu nan a ordena pa deporta, ta canando liber na Aruba “manera nad’un pasa”. Por lo menos un di e casonan aki tabata di pareha di un campañado conoci di POR, cu tabata ilegal riba nos isla pero no a haya OK di Minister pa lage bay. Esaki a causa basta disgusto pasobra aki e lider di POR no por a haci nada nada pa su campañador. Hasta si a faya aki, DPL lo a causa basta problema pasobra contra tur conseho lo a laga e persona bay. Pesey mes e campañador a tende cu su frei mester bay for di Aruba causando un disgusto cerca e campañador cu a kere cu e por libera su partner.
Un campañador Jamaiquino di parlamentario di POR tambe ta wordo considera heer en meester na Warda Nos Costa. E ta un di ensnan cu ta yega den nomber di POR pa libera ilegalnan cu ta wordo gara pa Warda Nos Costa. E departamento ta traha duro y asina cumpli cu e kehonan den pueblo di e cantidad di illegal riba nos isla. Mientras esaki ta sosode, Minister di Husticia Andin Bikker mes ta duna ordo pa liber ilegalnan. No sa con hopi e poder ta pa actua di e forma aki, despues cu Huez Comisario a toets e detencion y duna ordo pa deporta e ilegalnan cu tin varios aña na Aruba. Notable ta cu despues tog a base di yamada di minister of su chief of staff ta cana rond manera nunca a viola cualkier ley di estadia.