Minister Plenipotenciario Guillfred Besaril riba invitacion di e Vereniging van Nederlandse Gemeente (VNG) a asisti na e apertura di e congreso anual di VNG cu a tuma lugar e aña aki na Maastricht.
Tambe presente di Aruba tabata director di DRH sra. drs. Omaira Lares y funcionario di DRH sra. Cherissa KoKo.
Un congreso asina ta brinda un oportunidad unico pa topa y papia cu diferente gobernantenan di e municipionan na Hulanda. Un delegacion di e islanan Boneiro, Saba y Sint Eustatius tambe tabata presente. E mandatario tabata tin un encuentro ameno cu gezaghebber di Boneiro Edison Rijna.
Presidente di VNG Jan van Zanen a tene un encuentro special pa e participantenan di e islanan Caribense Hulandes. Na e ocacion aki sr. Van Zanen a anuncia cu na october di e aña aki e tin plan pa bishita e isla y paisnan di Reino Hulandes den Caribe. Minister Besaril a bisa sr. Van Zanen cu Aruba ta hopi interesa den mas cooperacion cu VNG specialmente tanto riba e tereno social como innovacion. Pesey mes lo keda den contacto cu VNG pa delinea a bishita y combersacionnan cu ta interesante pa e delegacion di VNG haci durante di nan bishita na Aruba.
Foto: Cortesia Cas di Aruba
