E uzo di Stichting Onroerend Goed Aruba (SOGA) ta un construccion di financia edificio y mantencion, cu a inicio den tempo di Minister Nilo Swaen. Via di e sistema aki a construi edificionan di belasting, ex Prome Minister Mike Eman a bisa den un declaracion, unda cu e ta aclarea cu nada di loke a wordo comenta riba MFA y SOGA ultimo ta berdad.
SOGA tabata responsabel pa no solamente construccion di edificionan di Belasting, pero tambe di Finanza y esun unda ATA tabata. Nan ta propiedad di SOGA, cu ta un fundacion. Si Gobierno paga un lease cu ta mas cu e costonan di SOGA, esaki ta keda den e fundacion y no ta wordo reparti bou di accionistanan. AE meta final di e fundacion aki, el a splica, ta pa construi edificionan pa Gobierno.
Gobierno ta prefera traha cu SOGA pasobra hopi biaha Gobierno ta hopi malo den mantencion di su propiedadnan. Y den e acuerdo semper SOGA ta keda responsabel pa e mantencion, y ta incorpora den e suma di lease. P’esey hopi biaha e ta un poco mas caro cu normal y esey tambe ta e motibo cu PPP ta hopi positivo, ya cu e ta inclui e aspecto di mantencion. Hopi Gobierno no ta duna mucho atencion na mantencion y na final ta haya nan mes cu gastonan demasiado halto. Den e caso di Green Corridor cada tanto aña Gobierno lo mester recap henter e caretera y e parti na banda, pero aworaki no ta responsabel pa esaki.
Eman ta kere cu Gobierno semper por drenta den deliberacion cu SOGA, repasa e añanan cu a traha cu nan, si e lease ta suficiente of ta di mas. E sistema di kehamento continuamente ta motibo cu Gobernacion no ta progresando na e momentonan aki. “Segun mi ta un debilidad hopi grandi cu e Gobernantenan ta demostrando. Si nos a dedica tempo na para mira atras y no traha, te awe KLM lo no a bolbe Aruba, Carnival Cruises lo no a bolbe, no lo tin un waf nobo ni hospital nobo.” El a sigui bisa cu cosnan cu Gobierno anterior no a haci, AVP a tum’e como nan responsabilidad pa si haci’e. Ora cuminsa goberna haci loke bo a priminti, como excusa pa para of obstaculisa cosnan. E ta un debilidad hopi grandi y loke por sinti den comunidad ta un preocupacion cu tin un Gobernacion cu no ta coy e toro na su cacho y cuminsa goberna. Mas ainda pasobra Aruba tin hopi oportunidad pa sigui crece. Aruba ta resalta den turismo door cu a embeyece Aruba, su producto ta miho, ta impresiona e bishitantenan. Esey tabata un vision di unda kier bay pero a cay den un periodo di stagnacion.
Gobierno no por manipula cu placa pasobra ta SOGA ta construi. Ta bisa SOGA cual ta e deseonan y nan ta percura pa henter e proceso cu tin cu sigui, cumpliendo cu e necesidad, te na entrega. Tur e aspecto financiero ta cay den man di SOGA cu semper a hacie di un forma pa cual e ta lamenta cualkier insinuacionnan cu por tin pa cu SOGA cu a traha cu tur Gobierno.
