Bou di grito bisiñanan a bay stop algun persona cu tabata cortando un mata di Watapana na Boegoeroei. Parce cu un chines a cumpra un tereno y cuminsa traha un tipo di mall. Segun informacion e bisiñanan tin mas cu 20 aña ta cuida e mata di Watapana. E mata ta casi na rand di caminda.
Un mata cu ademas di ta uno criyoyo di nos isla, ta tambe un atraccion special pa e turistanan cu ta pasa eybanda. Hasta tin tour cu ta pasa y nan ta stop un rato pa e turistanan mira y splicanan cu esaki ta un mata masha popular na Aruba. E mall a wordo traha pero diaranzon e chines a manda hende bin corta e mata. Ora cu nan a cuminsa corta di ambos banda, e bisiñanan a sali na grito.
E momento ey nan a core stop pero ya caba e mata tabata practicamente corta y a cay den banda. Cu dolor nan mester a mira con e mata a wordo destrui. Kizas e mata ta na rand di e tereno pero e bisiñanan ta sinti cu e mata di Watapana por a wordo scapa na un otro manera. Nan tabata hopi rabia cu e forma cu kier a deshaci di e mata manera esaki no tin su balor. Spera cu otro hendenan cu tambe topa e situacionnan asina tene bon cuenta cu mester purba scapa e matanan di Watapana riba nos isla.
