Miguel Nucete tin mas di 20 aña trahando pa Panaderia Moderna y ta representante di e Asociacion di Panadero, kende, hunto cu demas miembronan, a reuni cu Minister Xiomara Ruiz. El a splica cu e reunion a bay hopi bon.
A papia riba e prijs di pan. Awo cu BBO, BAZV, BAVP lo bay influencia e prijs di consumidor, pa mira kico por haci. A bin cu e idea pa nan, pa mira si nan por pone pan bek den canasta basico y elimina tur loke ta e impuestonan for di e canasta basico.
Nan mes tabata pensando riba esey y ta studiando esaki. Pero no por haci’e di biaha y no lo por keda cla pa dia 1 di Juli. Esey ta motibo cu e suppliernan ta bay cobra e porcentahe extra y djey cobra e 2.5% extra ora e panaderonan rebende. Y e retailer, esta e supermercado tambe lo tin cu bolbe cobra e porcentahe aki na e consumidor. Lo bay mira un aumento den e prijs di pan. Ta spera cu gobierno logra haci algo cu e canasta basico. E ora e consumidor lo mira un bahada den prijs, en bes di un subida.
E panaderonan a entrega nan facturnan pa nan por haci nan investigacion y dia 20, 21 di Juni lo sinta bek cu Economische zaken, wak ki prijs lo por pone y yega na un acuerdo, pa despues bay na e minister, pa asina e yega na un decision final.
Pan blanco den canasta basico
Segun Nucete, pan blanco so ta den e canasta basico. Semper e tabata pan blanco. Kier cuminsa si pone pan bruin den e canasta basico y nan kier wak si por yega na pone e pan blanco y pan bruin, tur dos na e mesun prijs. E ora e consumidor no solamente come pan blanco, pasobra e ta mas barata, sino awo e por kies pa come pan bruin, pasobra e ta e mesun prijs. Esey tambe nan ta evaluando cu si minister logra, e lo ta algo hopi bon pa e consumidor.
Pan blanco plus
Tur pan blanco cu tin riba mercado ta pan blanco plus. No tin pan blanco riba mercado, pasobra na e prijs cu economische zaken tabata tin’e 7 aña pasa, no tabata por a haci’e. Tur panaderia tabata traha pan plus. Idea ta pa hinca pan blanco, pan plus, con cu kier yam’e, den e canasta basico. E ora e consumidor ta haya un control, e ora bo no ta haya cierto luganan cu ta bende diferente pan na diferente prijs, sino un solo prijs pa tur hende.
Pan den canasta basico
Den canasta basico actualmente tin pan blanco. Pero e no ta wordo produci for di 7 aña pasa. Di 7 aña pasa e kipashi, hendenan ta conoce e prijs di 3 florin 70 cent. E no a subi den e ultimo 7 añanan. Loke a subi ta BAZV. Pero e prijs mes no a subi. Loke a subi ta e impuesto.
Speculacion
A hiba tur papel pa gobierno y e prijs lo bay bira 4 y algo. Si no subi’e mes y si pone 6%, ta pone e retail price 6%, bo ta pasa 4 forin. A pidi gobierno pa subi e prijs na 4%. Nan tin 7 aña cu e mesun prijs. Tur cos a subi den e ultimo añanan, manera prijs di gasolin, gasoil. Panaderonan ta uza gasoil pa delivery y gas pa horna pan. E gastonan di e panaderonan a subi y ta pidiendo 4%. Gobierno lo bay evalue y ta spera cu por yega na un acuerdo y pa dia 1 di Juli, tin pan blanco y por ta hasta pan bruin den e canasta basico.
Prijs a keda manteni
21 aña pasa, gobierno a duna vrijstelling riba mashinnan nobo, no riba piesa, etc. Por lo general, despues di esey, te ora cu BBO a keda introduci, tambe tabat riba pan. BAZV tmbe a keda introduci riba pan. Nunca nan a keda compensa of ricibi ayudo di gobierno den un manera.
Si no haya OK
Si en caso cu no haya un OK di gobierno, e lo bay dal e panaderonan duro. E ora e suppliernan lo bay cobra e 2.5% pasobra e ta para den ley. E panaderonan mester cobra e supermercadonan 2.5% pasobra tin cu pas’e extra pa gobierno y tur supermercado lo pone 2.5% riba dje. Tur cos ta bay subi. Ta haciendo un research tambe cu economische zaken, cu ainda na Aruba, compara e pan blanco di Aruba cu esun di Florida, e prijs di pan blanco na Merca ta $2.35 riba shelf. Si bo cumpr’e na florin y pone tax riba dje, lo ta na 4.40. E lo ta 24% bao di e prijs na Merca. Hopi producto na Aruba no tin esey. Tin hopi producto cu ta 30 y 40% mas halto compara cu Merca y Economische Zaken kier wak dicon. Si cierto cosnan por match e prijs, dicon otro productonan ta mas caro cu Merca.
