Diaranson merdia e lider di fraccion Accion 21 den parlamento, Miguel Mansur, a splica e motibo pa cual el a vota contra di presupuesto 2023.
“Mi no kier bagatelisa e echo cu tin 1% di surplus pasobra esey ta un mehoracion riba un deficit. Esey kier men cu nos ta stop di endeuda futuro generacion di Arubiano,” asina e politico a bisa. Di otro banda, a indica cu “tin dos manera pa bo logra un surplus: un ta baha gasto di gobierno y e otro ta impone medida y hisa entrada.”
Mientras cu International Monetary Fund (IMF) y College Financieel Toezicht (CFT) tin decadanan consehando pa baha gasto di gobierno den un forma structural, lamentablemente esey no ta loke a sosode den presupuesto 2023, segun Mansur. Loke a wak ta mas medida riba pueblo, riba e bishitantenan; cosnan cu ta bay haci e prosperidad economico mas dificil.
Mansur: “Semper mi ta bisa: Ora bo ta bin cu mas medida, bo ta hisando gasto di sector publico cu despues sector priva mester bay paga p’e. Lo m’a prefera un surplus a base di bahada structural den gasto di gobierno.”
Durante tratamento di presupuesto supletorio 2022, e parlamentario a puntra minister di finanzas pa bisa ki gasto a baha, pero no tin. A referi na gasto di personal, pero esey ta door di e cortamento den salario. Dus e bahada structural no a sosode ni den presupuesto 2022, ni den presupuesto 2023.
El a splica cu su lamento di mas grandi ta cu na luga di baha gasto di gobierno, minister di finanzas a admiti cu gastonan a subi atrobe. Kier men awo ta pueblo tin cu bay paga pa e excesonan ey y tin hopi espacio pa reduci gasto.
Pa e relato completo, lesa e edicion di TREMPAN
