Recientemente a keda anuncia cu Armstrong Oil & Gas Inc. a informa Minister di Energia, Glenbert Croes, cu nan investigacion preliminar ta cla y nan compania a bay di acuerdo pa financia un proyecto multimiyonario di exploracion di gas y petroleo den lama rond di Aruba.
E compania a identifica tres diferente sitio, caminda nan ta kere cu posiblemente lo tin un pos di sea petroleo of gas. Nan a yama e posnan Andicuri, Masbango 1, y Masbango 2. Bo lo pensa cu tur e ‘bon comunicacion’ cu tin entre gobierno di Aruba cu Hulanda cu nan lo a menciona esaki na nan, of cu sikiera e pregunta bini dilanti si cualkier extraccion di gas riba e isla lo por cambia e dinamica di negociacion den termino di interes y debenan.
Nos a haci e pregunta aki na Secretario di Estado pa Relacionnan di Reino, drs. Alexandra van Huffelen, kende ta di bishita den e islanan den Reino, y ta contesta nos cu e no sa mucho riba e tema. Hasta por a nota cu a haya esaki un poco comico den un forma, bisando cu ‘mi no a tende di esaki mes.’ E ta indica cu pa nan esaki ta noticia nobo, anto e secretario di estado a hasta señala cu na Hulanda a stop cu produccion di gas na e planta di Groningen. “Mi no a scucha di esaki mes.”
Mientras cu na Aruba ta invertiendo miyones pa e posibilidad di extrae gas, na 2023 produccion di Gas na e planta na Hulanda (Groningen) a keda stipula pa termina riba 1 di october segun gobierno Hulandes pa asina cumpli cu nan promesa di rapidamente stop extraccion di gas pa asina limita riesgo di impacto (seismic) den e region.
E ta un planta opera entre Shell y Exxon Mobil cual ainda tin reserva grandi di gas natural, pero produccion a reduci drasticamente durante ultimo añanan pa motibo di temblornan relata na e drilling causando daño grandi den e area, como tambe angustia mental pa hendenan bibando den e area aki segun medionan Hulandes como tambe internacional a raporta.
Facilidadnan di produccion lo mester ta completamente cera pa 2024, pero lo tin opcion pa extrae cantidadnan limita di gas den e circunstancianan extremo durante e proximo aña.
