Miembro di Tweede Kamer pa CDA sra. Joba van den Berg ta prome bes den region Caribense y e reunion di IPKO tabata tambe ta su prome experiencia. “Mi a haya e bishita aki un experiencia maraviyoso y nos a wordo ricibi cu masha cordialidad, sin lubida e dushi temperatura aki nan compara cu Hulanda durante e temporada aki.”
Sra. van den Berg a bisa cu p’e tabata importante di por a topa cu e otro miembronan di Parlamento. E contacto ta esencial y no solamente den sala di reunion, pero sigur ora papia cu otro den un esfera mas trankil hayando asina extra informacion. “Awemainta nos a haci un bishita di trabou na e hospital (renoba). Masha bunita mes loke ta tumando lugar eynan y mi a anota dos punto cu mi kier discuti riba nan ora mi yega Hulanda. Un di nan ta cu sa tin falta di cierto remedi y e diplomanan cu mester wordo reconoci (BIG). Ora mi yega Hulanda mi ta bay haci pregunta riba e temanan aki ya cu nos mes tambe tin escasez di centenares di remedi. Nos por wak con hunto nos por yega na un solucion.”
E otro bishita ta regarda e proyecto di algae riba tereno di CITGO. “Esaki ta muestra con Aruba kier amplia y fortifica su economia. Nos ta haya e inciativa aki masha importante. Pa nos ta bunita pa constata cu Universidad di Wageningen ta envolvi den e proyecto aki.” Renobacion di dr. HOH mescos cu e proyecto di algae ta otro iniciativa di Gabinete Mike Eman II cu ta wordo ehecuta hunto cu TNO den cooperacion cu Universidad di Wageningen. Sra. van den Berg a haya esaki algo fantastico.
