Fin di siman ta cera cu hopi hende preocupa y cu hopi incertidumbre riba e situacion financiero riba nos isla. Parlamentario Michael Lampe a duna di conoce cu ta purbando di canalisa e sentimento cu ta hayando for di tur angulo, mas aun den temporada di fin di aña.
Lastimamente pueblo ta sufriendo bou di un mal maneho existente, caminda cu pobresa creciente ta trece un tension, e situacion social ta bira pio cada dia. Michael Lampe a remarca cu tur esaki ta consecuencia di e maneho catastrofico di e coalicion actual.
Companianan den situacion serio pa cu pago na trahadonan, den un temporada caminda cu mester ta den celebracion, comunidad ta reacciona y indica cu nan no por haci tal pa motibo di e situacion financiero cu nan ta aden. No por paga trahado, no por festeha cu trahado, no tin trankilidad.
Den un periodo di dos aña, un gobierno SIN vision, cu na prome instante a priminti di bin cu solucion, awe por nota claramente cu nada no ta berdad. Promesanan di campaña, en particular di partido MEP, no a conoce realisacion. No a cumpli cu nada!
Parlamentario Lampe ta indica tambe riba e hecho cu e Gobierno ta papiando di un era nobo, desicionnan positivo, entre nan Minister Dangui Oduber riba progreso den turismo, ta asuntonan cu merece di trata cu mas seriedad pasobra pueblo no ta sinti e progreso aki ningun caminda!
Minister Dangui Oduber lo ta un di e poconan cu ta sinti un progreso of esunnan mas cerca di dje ta sinti un progreso ficticio mirando cu nan ta e uniconan beneficia den desicionnan tuma dor di e gobierno di coalicion aki. Na otro banda e pueblo ta pasando den tempo hopi duro caminda ta incomprendibel con e gobierno por papia di progreso. Ta parse cu nan no ta compronde e dificultad cu pueblo ta aden.
Locual cu ta resalta den pueblo ta cu nan ta fada di wanta tanto medida, Gobierno ta bati nan cada biaha cu un medida nobo pero den tur ironia ta bin den nan cara y papia di progreso.
Entre tanto comercia ta cayendo, aire negativo ta circula dor di un gobierno cu ta tuma desicionnan descabeya. Un Gobierno cu ta na mando dor di engaño na e pueblo votado.
Pa finalisa Parlamentario Michael Lampe ta expresa cu partido AVP ta trahando riba un vision fuerte cu ta realmente pa pais Aruba y ta pa e motibo aki mes ta corda pueblo cu partido tey pa nan, para hunto cu nan den tempo dificil, traha, sali y mehora e situacion di comunidad.
