Diasabra un empleado publico di DIP a yega na Big Mama pa haci bida di nos Arubianonan uno imposibel. Cu su arogancia Marylaine Kock di DIP ta yega yena cu frescura manera e mes ta doño di Sero Colorado pa stroba operacion di Big Mama. Big Mama ta bay cumpli 25 aña di existencia. Un pida negoshi cu a crece bira exitoso awe.
Un area cu a bira un atraccion importante pa nos turistanan. Un area cu casi hende no tabata bishita. Awendia e local- y turistanan por yega y gosa di un beach bon cuida y cu un restaurant cu t’ey pa sirbi cada bishitante. E turistanan ta contento y ta bolbe tur aña den cada bishita na Aruba. Nos redaccion a papia cu tres diferente turista y entre nan hues na Merca. Nan a expresa con dushi nan ta pasa durante nan bishita na Baby Beach y e atencion cu Big Mama Restaurant ta duna nan durante nan bishita. Gobierno tras di gobierno semper a respeta presencia di Big Mama. Tur asignatura a acepta cu Big Mama t’ey.
Awo diripiente e no ta bon mas, por lo menos pa Marylaine Kock di DIP. Parce cu famia Raven ta un famia Arubiano despues di 25 aña no tin derecho mas riba nan propio pais. Probablemente kier elimina Big Mama pa complace stranhero cu hotel. Gobierno mester cuminsa respeta nos yiunan di tera cu ta traha duro pa asina yega na algo y cria nan famia. Ora cu nan bira exitoso, diripiente ta nos mesun hendenan di DIP ta bin causa molester.
A bisa Marylaine Kock cu ta varios ocasion ta buscando reunion cu DIP. Te awe DIP no ta habri pa reunion. Pa actua y causa daño na e negoshi si bo tin empleado publico manera Marylaine Kock pa yega riba un diasabra yena cu arogancia. Famia Raven no ta bay laga ningun gobierno of empleado publico of departamento bin kibra nan negoshi. Nan a gatia y cana pa awe nan por ta riba nan pia. Como Arubiano nan tin hopi mas derecho cu cualkier grupo miyonario cu ta yega y haya tur cos cla den un tayo. Famia Raven a manda e mensahe cla na DIP. Manda e permisonan pa nan paga. Nan ta cumpli tur luna cu hopi placa na caha di gobierno.
P’esey nan tin e derecho di por funciona cu nan negoshi sin cu ta busca manera di kibra nan of elimina nan pa acomoda inversionista stranhero. Lo sigui e desaroyo aki masha di cerca pa asina pone un paro na e mal intencion di DIP pa kibra negoshi local cu 25 aña di existencia.
