Durante e conferencia di prensa di partido MEP dialuna, Parlamentario y lider di fraccion MEP, Hendrik Tevreden a indica cu fraccion di Accion21 ta purba bruha tera.
Den fin di siman parlamentario Miguel Mansur a manda un carta indicando cu presidente di Parlamento Edgard Vrolijk no tin sosten como presidente di Staten. Tevreden ta bisa cu e carta aki pa nan sigur ta un sorpresa pasobra te cu siman pasa e no tabata sa cu Mansur tambe ta sostene Edgard Vrolijk y cu ta parti di coalicion cu tambe ta sostene su presidencia.
“Semper mi a kere cu Mansur tabata contra Vrolijk a pesar cu Vrolijk a mustra di ta haciendo tremendo trabao como presidente di Staten,” Tevreden ta bisa. Aparentemente for di e carta aki ta bin compronde cu Mansur tabata sostene Vrolijk y awo e ta kita su sosten, cual ta indica cu Vrolijk ta keda cu mayoria di sosten pa ta presidente di parlamento. “Es decir cu e carta cu el a manda ta bisa nada pasobra e carta no tin ni pia ni cabes, pasobra nos como coalicion ta sostene Vrolijk pa por continua haciendo trabaonan di presidente.”
Mas ainda ta importante pa recorda Mansur cu e presidente di parlamento tin un Landsbesluit, segun ley bo ta keda eligi como presidente cu un tempo mara na esaki. Ta ora cu e temporada ey pasa y bini un ronda nobo pa eligi presidente nobo bo ta haci esey si a caso bo ta desea esaki. “Nos di fraccion MEP na ningun momento ta desea di cambia di presidente.”
Manera Tevreden a indica na varios ocasion caba e ta haya Vrolijk ta haciendo un tremendo trabao. Vrolijk ta un parlamentario cu pa hopi tempo a entrega diferente ley importante pa pais Aruba, entre otro manera contra corupcion politico. “Bo ta mira cu e ta un persona pro activo cu ta dirigi y kisas no tur biaha bo ta di acuerdo con e ta pon’e, pero sigur bo tin cu bisa e ta un hende corecto, integro y tambe dedica cu hopi pasion na su trabao.”
Bao di su encargo tambe, segun Tevreden, por mira cu tin un avance den parlamento. Naturalmente e placa pa avansa construccion di parlamento ta bini di parti di gobierno, pero si bo no tin un presidente dedica y percura pa keda busca esaki, entrega plan, percura pa esaki keda fiha hunto naturalmente cu staff di griffier. “Bo ta mira cu resultadonan ta papia pa su mes, cu Vrolijk mi ta kere ta un presidente digno cu ta merece pa mira continuacion akinan den parlamento den su temporada como presidente den un forma trankil.”
MEP ta sostene Vrolijk y ta rechasa e carta di Mansur completamente anto kier haci un peticion na Mansura pa percura p’e sa su reglamento di ordo pa asina ey por sigui cu esaki sin trece ponencia asina den prensa causando intrankilidad innecesario den parlamento di Aruba.
“Nos ta e instituto di mas halto, esun importante den e pais aki y trabaonan aki mester ta haci den forma serio pa asina ey nos tambe por duna ehempel den un forma serio na nos comunidad.”
