Mirando cu continuamente tin confusion riba e situacion di Hotel Secrets na San Nicolaas, Parlamentario Marco Berlis (MEP) a haci un serie di pregunta na Minister di Infrastructura, esta mr. Evelyn Wever-Croes dia 13 di september ultimo. E parlamentario a manda puntra e prome mandatario cu, segun su informacion, a sigui traha riba e parti di hotel unda cu no tin keho riba die. Awo e ta comprende cu e hotel tin varios permiso pa cada parti di e construccion. Sinembargo, awor e cuater personanan cu a entama caso contra construccion di e hotel a bolbe menasa cu lo bay hues pasobra ainda ta construyendo partinan di e hotel. Nan ta sinti cu no mag construi ningun parti di e hotel mientras e caso ta andando. Berlis kier pa Wever-Croes splic’e si enberdad ainda ta trahando riba Hotel Secrets of si tur trabao ta para.
E parlamentario di e Fraccion di MEP den Parlamento a manda puntra Prome Minister si e denuncia haci di e bisiñanan tin chens di para tur trabao na Hotel Secrets atrobe. Na mes momento, e representante di pueblo kier haya sa pa ki tempo lo tin e ontheffing cla, cual lo tene cuenta cu tur reclamo di e habitantenan/denunciantenan, pa asina construccion por sigui teniendo cuenta cu e reclamonan.
E parlamentario ta corda ainda cu Gobierno a bisa di lo reuni cu e inversionistanan di Hotel Secrets, pues e ta desea pa sa con a bay cu e reunion aki y si inversionistanan por a duna un deadline pa construccion por sigui y pa caba di completa e proyecto completo. Esaki pasobra, e parlamentario ta imagina, cu tanto tardansa asina, cu dado momento por hinca henter e proyecto, specialmente e financiamento, den problema serio.
“E proyecto di Secrets ta representa hopi mas cu un djis un proyecto di hotel, sino un speransa berdadero cu awor si proyectonan grandi y concreto ta bay wordo edifica na San Nicolaas, cuanto prioridad y ki tur ta wordo haci pa salvaguardia e proyecto aki?”, asina e parlamentario a manda puntra den su carta na e prome mandatario di nos pais. Di e forma aki e fraccion di MEP por ta sigur cu no tin ningun sorto di intento pa gobierno mes stroba desaroyo di e proyecto aki y asina limita e pueblo di San Nicolas pa tambe por conta cu un proyecto turistico grandi y importante asina den nan districto.
E fraccion di MEP, representa pa Marco Berlis den e carta di pregunta, kier sa tambe si logra gana e caso of yega na un acuerdo cu denunciantenan, pa ki tempo lo cuminsa edifica e infrastructura p’e hotel? Parlamento kier haya un lista di e kehonan oficial y e exigencia di e cuater denunciantenan cu ta contra e proyecto di Secrets.
Un di e aspectonan cu no a tende mucho di dje pero cu ta un problema pa pabou di brug, ta relaciona cu maneho di awa preto di e hotel. E parlamentario a manda puntra si ainda e plan ta pa Hotel Secrets tin su mesun planta di procesa awa sushi. Esey ta pone cu e presion e ora ariba e planta di purificacion di awa, RWZI, lo ta menos. A manda puntra e minister tambe kico ta e suma total di inversion den e hotel Secrets na San Nicolas.
Parlamentario Berlis ta corda cu tin un proyecto di condominium cu tabata den construccion n’e barancanan di Rodgers Beach, cu nunca a termina. E proyecto aki tin varios aña caba bandona. Den e caso aki, tin otro cumprado na bista of DOW lo bay over pa kita e edificio aki, cu tardi of trempan lo bira un mahos bista pa e area? Tambe, tin mas baranca cu espacio pa carga mas condominium na Rodgers Beach, aunke esaki lo kita di e bunita panorama di e area ey. Berlis kier sa si gobierno lo duna mas permiso pa esaki si inversionistanan serio presenta un plan pa Rodgers Beach.
Tocante Secrets Baby Beach Aruba
Tabata na november 2019 cu AMResorts®, un compania di Apple Leisure Group® (ALG), a anuncia un acuerdo nobo pa construccion di 600 camber pa e proyecto Secrets Baby Beach Aruba situa cerca di Baby Beach, na San Nicolas, como parti di e cadena di Secrets® Resorts & Spa. E grupo tras di e proyecto ta Grupo Martinón, estableci na Aruba via e compania Three Rivers Real Estate VBA.
E intencion ta pa traha 600 camber prome, evalua e proyecto y despues amplie cu 300 camber mas! Ora a anuncia e proyecto na november 2019, a bisa cu lo cab’e na final di aña 2021. E proyecto completo ta costa alrededor di 200 miyon dollar Mericano. Pero, pandemia y despues batayanan legal den corte ta haci cu awe na 2023 ainda falta bastante ainda pa por finalisa e hotel gigantesco aki!
E hotel ta destina solamente pa adulto y lo ofrece e concepto conoci como un vakantie exclusivo “Unlimited-Luxury®”, cu ta cubritur e opcionnan di cuminda y servicionan den e hotel, cu ta inclui oferta di cuminda estilo “gourmet a la cart” sin reservacion, servicio di cambernan y roomservice 24 ora pa dia, bebida sin limite, mini bar den camber, actividadnan y entretenimiento nocturno “live”. Y tur e servicio y actividadnan aki ta inclui, pues no mester ni sali cu tas of cartera!
E grupo Apple Leisure Group® (ALG) ta un di e companianan principal di tours, biahe y hospitalidad di Merca. Via su compania AMResorts® nan a desaroya of ta desaroyando proyectonan hotelero grandi den Caribe.
Siendo un compania reconoci como un lider den e mercado di hotelnan “All Inclusive”, awendia AMResorts® ta maneha 66 hotel di e marca aki cu como 9000 camber den pleno desaroyo. E compania ta posee como 24000 camber bou varios marca di hotel na Mexico, den Caribe, Merca y Spaña.