Por lo menos un miembro di Parlamento di Aruba, esta Shailiny Tromp-Lee, a cuestiona Gobierno di Aruba riba e tardansa pa cu e trabounan di cobamento na Palm Beach. En bes cu el a bira un trabou di algun siman, el a para bira un trabou di algun luna caba, sin cu ta mira final na horizonte. Prome Minister mr. Evelyn Wever-Croes, politicamente responsabel pa maneho di Dienst Openbare Werken (DOW), a sali splica cu tabatin motibo valido pa e tardansa cu a confronta.
DOW a splica cu e motibo pakico e proyecto di drenahe di awa di yobida na Palm Beach tin retraso, ta na prome luga cu a topa cu un kabel y tuberia cu no tabata identifica, pa cual motibo cu mester a adapta e concepto original. Na di dos luga ta door di falta di likides financiero di e contratista y falta di personal pa traha riba e trabao.
DOW no a sigui splica con e compania no ta solido financieramente, anto ta dicon a scoge nan anto pa e trabou. Normalmente ta tene destaho publico y un di e condicionnan di e compania di construccion ta cu e tin rosea financiero pa por carga e proyecto. Awo pa culpa di un compania priva, cu no tin forsa ni tin suficiente trahado pa cumpli cu locual a acorda, ta stroba y afecta tur cas y negoshi den e area.
Pero, DOW a splica Prome Minister, kende na su turno a manda informa Parlamento di Aruba cu conforme e schedule nobo, cu e trabaonan lo mester finalisa pa fin di october 2023, pues fin di otro luna. Esaki despues cu originalmente a programa pa keda cla na juni 2023, pues e proyecto ta canando tres luna atrasa caba!
Un di e retonan cu bisiñanan ta señala, ta e cura cu a basha abou tras di CITGO Palm Beach. Nan kier sa cu si ta bay lant’e bek. Riba esey Gobierno a infirma cu e doño di e pomp di gasolin a tuma iniciativa pa basha e cura temporalmente abao pa asina por duna mas acceso na su clientenan. Gobierno ta sali for di e punto di bista cu e lo lanta e cura bek na momento cu finalisa e trabao. Sinembargo, e bisiñanan ta insisti cu ora e cura tabatey e awa no tabatin caminda di bay y esaki tabata ocasiona hopi molester. Gobierno a pone riolering nobo y esaki a yuda bastante. Pero bisiñanan ta señala e cura tambe como un problema. Pero DOW a laga sa di no ta conoci cu e preocupacion aki.
