Melony Croes-Paesch a presenta awe den Corte pa asina scucha e sentencia cu Ministerio Publico ta pidi contra su persona pa loke ta e caso di IBIS. Desde inicio di e caso el a duna su sosten na su casa, esta ex Minister Paul Croes.
E sospechosonan a ricibi 15 minuut pa bisa nan ultimo palabranan, pero Melony Croes-Paesch a uza e momento aki pa saca afo con e situacion aki a afecta su persona, su yiunan y famia. Tambe el a bisa cu hopi cos no ta cuadra den loke Ministerio Publico a trece padilanti. Fiscal ta exigiendo un castigo di 240 ora di trabou pa comunidad pa Melony Croes-Paesch, kende ta haya cu esaki no ta bon y ta laga e decision den man di Hues.
Fiscal a sigui ataca nan bisando cu ta drama nan a bin haci den Corte pa tur loke a pasa nan den e ultimo 2 añanan. Pa su persona esaki ta un falta di respet di parti Ministerio Publico. E sospechoso a yega Corte enfoca pa no sigui e wega di Ministerio Publico. Melony Croes-Paesch tabata hopi emocional durante su “laatste woord”, unda cu el a papia riba su famia. “E no ta algo cu bo por splica di tur loke nos a pasa aden”, el a expresa. Terminando tur loke e kier a trece dilanti, Melony Croes-Paesch a haci algun pregunta na Ministerio Publico mirando cu te fecha di awe no a ricibi contesta riba esakinan.
