Purina hunto cu e organisacion local Hope for Paws Drive di e rumannan Banfield a haci donacion di mas cu 1800 liber pa mascotanan manera pushi y cacho, na algun fundacion local.
Anna Maria Ramirez, di Mercadeo di Purina, a splica cu ta cu orguyo nan ta haci entrega di e donacion na e organisacion Hope for Paws, cu ta un iniciativa di dos ruman muhe, kendenan ta recauda cuminda pa pushi y cacho y ta entrega esaki na fundacionnan local cu ta atende cu e bestianan aki di cas cu nan haya riba caya of cu a wordo bandona di un of otro forma.
“Nos ta contento di por contribui na esaki. Loke a haci e donacion aki mas special ta cu empleadonan di Compra tambe a recauda bou di nan mes y asina e total di donacion a bira mas di 1800 liber. Nos ta hopi contento di por a contribui na e iniciativa aki cu ta algo cu nos ta celebra cu ta yuda e problematica di mascota riba caya,” Ramirez a conta. El a agrega cu Purina ta conoci como e cuminda cu e miho nutriyentenan pa tanto cacho como pushinan. “Nos ta contento di aporta na iniciativanan asina cu ta yuda sigura e bienestar di mascotanan na Aruba.
Stacey Banfield di Hope for Paws tabata presente pa ricibi e donacion y a splica cu tanto su persona como su ruman muhe Shanley semper tabatin un stimacion grandi pa bestia. E ta corda cu aña pasa nan mama a adopta un cacho di 2 aña bieu for di un shelter. E cacho facilmente a adapta su mes na nan famia. “Esaki a demostra cu cachonan di shelter merece un di dos oportunidad, despues cu nan a wordo bandona.” Durante fiestanan di fin di aña e rumannan a papia riba con por yuda e cachonan di caya cu ta wordo recogi. Eynan e idea di Hope for Paws drive a lanta y a cuminsa di biaha den luna di december. A logra haya hopi bon donacion y a logra yuda tres diferente fundacion. Awo na mita di aña a pensa pa haci algo atrobe pa e fundacionnan cu constantemente ta den necesidad di ayudo. E problema ta constantemente y pa cual mester di ayudo di forma regular. P’esey awo a dicidi di haci un evento y a keda hopi contento cu e donacion di Compra. “Compra a haci nos asina hopi contento y e fundacionnan tambe. Nan donacion lo haci un diferencia hopi grandi pa e trabou cu e fundacionnan ta haci. E ta demostra tambe cu e companianan priva ta dispuesto pa yuda animalnan den necesidad,” Stacey Banfield a bisa.
