Den un carta manda awe pa presidente di Parlamento door di miembro y lider di fraccion di MAS, ta pidi pa Minister President Evelyn Wever-Croes manda di inmediato e hallazgo di e investigacion cu Centrale Accountants Dienst (CAD) a haci den Arubahuis. Esaki ta relaciona cu e anuncio di parti di Guilfred Besaril cu e ta renuncia como Minister Plenipotenciario di Aruba na Hulanda.
Den e carta, e firmantenan, drs. Marisol Lopez-Tromp y Aquannette Gunn ta haci referencia na e articulo publica awe den e website di 24ora.com titula: Manera premira: Guilfred Besaril a anuncia su retiro como Minister Plenipotenciario na Hulanda” cual nan ta considera como un decision abrupto y pa cual kier mira e conclusionnan di e rapport di CAD.
Premier Wever-Croes a instrui Central Accountantsdienst na fin di 2021 pa cuminsa un investigacion den e operacion di Arubahuis despues cu el a obtene informacion di “cosnan cu por ta no a bay bon na Arubahuis aña pasa”. Dia 11 di april ultimo, e prome mandatario a informa cu ainda e investigacion no tabata cla.
