Aruba Airport Authority N.V. a caba di anuncia cu aeropuerto lo ta cera awe entre 9 pa 11’or di anochi mientras ta realisa un test di e generator. E accion aki ta bin despues cu ayera Aeropuerto Internacional Reina Beatrix a bay plat na momento cu e isla a experiencia un blackout total pa un par di ora.
E comunicado ta indica cu: E generators y e sistema di backup di aeropuerto no a tuma over e suministro di coriente manera mester tabata, causando cu e aeropuerto a keda sin electricidad te 3’or di atardi. Aruba Airport Authority N.V. (AAA) a activa e crisis team di AAA y a implementa e proceduranan aplicabel di emergencia.
E seis (6) generator na aeropuerto ta pasa door di test y mantencion regularmente y manera cu e fabricante ta recomenda. AAA N.V. tambe tin acuerdonan di servicio cu companianan capacita di mantencion pa brinda e servicio aki. No tabatin ningun indicacion durante e ultimo test cu e generators no lo funciona den caso di un fayo di coriente.
Awe, diabierna 10 di juni, pa 9’or di anochi, lo tene un test di generator na capacidad completo den un ambiente control y den presencia di expertonan (interno y externo, incluyendo Elmar y otro proveedornan di servicio). Lo paga e electricidad di e cuater transformer den e Edificio di Utilidad di Elmar un pa un, y lo monitor y sigura cu e diferente parti di e sistema di backup ta reaccion y traha corectamente.
E terminal lo ta cera e momento ey y p’esey ta cera dos ora prome cu e orario normal (9 pm na luga di 11 pm). Tur operador di servicio na avion y otro servicio di emergencia ta informa di e cambio aki. Un bes cu a identifica e causa, AAA N.V. lo cuminsa cu e solucion necesario.
E prioridad mas halto di AAA N.V. ta determina e causa y posteriormente implementa un solucion. AAA N.V. lo mantene e comunidad di Aruba actualisa asina cu esaki ta conoci.
