Fraccion di AVP ta preocupa. Den un forma silencioso minister di enseñansa, dr. Rudy Lampe ta bayendo contra un decision di parlamento, cu tin di haber cu independisacion di scolnan na Aruba.
A base di esey fraccion di AVP a constata diferente desaroyo y ta sali afo pa pidi un reunion publico pa asina haya aclareacion for di gobierno riba e issue aki.
Lider di fraccion di AVP, Marlon Sneek ta comenta cu nan a entrega un peticion pa un reunion publico cu minister di enseñansa.
A pasa mocion 33 den Parlamento, unda cu e ta bisa e minister cu no kier pa indepensa DPS y ningun otro subdepartamento. E ta hungando un wega di haci manera DPS ta e scolnan den dia so, esta MAVO, e scolnan basico y middagMAVO si y avond MAVO no ta cay bao di DPS.
Esaki tambe ta DPS segun Sneek. Por a mira cu e minister ta den full swing pa e scol aki cay bao di un stichting e aña escolar aki. Loke parlamento a bise cu e no kier pa e haci, toch e minister aki ta haci’e. Ta na su luga pa yama e minister aden, pa e duna cuenta cu con ta posibel cu parlamento cu 18 voto na fabor, ta pasa un mocion y e minister aki no ta cumpli cu e mocion cu a wordo pasa.
Tambe a haya mescos riba mocion 85, caminda cu a bisa e minister cu MDC ta un departamento cu ta atende cu muchanan cu tin un of otro problema na scol, cu nan ta bin den klas cerca nan, den e caso aki ta papiando sigur di e muchanan mas chikito, cuminsando for di Kleuter bay 1ste klas y na MDC nan tin klasnan caminda cu ta ya a esaki como un centro di observacion, dunando e muchanan un miho guia posibel y despues e muchanan aki por bay scol bek y sigui monitorea e muchanan aki. Tin un gran cantidad di trahado cu e minister a manda ter beschikking sea di SKOA of di ministernan cu ta na mando, unda cu a debilita e departamento aki. A bisa e minister pa e mocion 86 pa percura pa e departamento aki haya e atencion y haya e hendenan cu tin mester bek y no pa cera e klasnan cu e tin pensa di cera. A tuma nota cu despues di e aña escolar aki, tur cos ta indicando con e sindicato cu ta representa e trahadornan eynan, a sali bin dilanti, ta mustra cu e minister lo cera e dos klasnan ey, cu na final di cuenta, e lo percura pa e wachtlijst bira mas grandi. Ya tin un wachtlijst cu tres klas. Imagina si bay pa un klas so. Kico lo bay spera nos pa e wachtlijst cu tin na MDC. Ta dos mocion cu parlamento a tuma uno cu 18 voto y e otro cu 19 voto y ta mira cu e minister toch ta haci otro cos, ta sigui su mesun caminda, sin tene cuenta parlamento a bis’e pa loke ta e punto aki.
Poder
Lo bay wak kico e minister a haci, pakico e kier sigui den e direccion cu e kier sigui, siendo cu tin un mocion den parlamento, esun cu ta control’e, a bisa unanimamente cu nan no kier bay den e direccion ey. Si e sigui den e direccion ey toch, e palabra ta na parlamento pa wak kico ta locual nan ta bay haci. Pesey e reunion publico aki, Sneek a comenta.
Forma di maniobra
Esaki ta mustra den un forma silencioso y den pida pida. Sneek a splica cu e ta haya cu por come un pisca completo of na mochi. E minister aki ta come na mochi, keriendo cu ningun hende sa kico e ta haciendo y ta di lamenta. Esaki ta trece incertidumbre. A scuch’e papia bisando cu e personanan aki ta bin na ter beschikking. Esaki ta trece incertidumbre den e siguridad di trabao di e personanan aki y Sneek no ta mira pakico crea tipo di situacionnan asina, unda cu pa añanan largo por mira cu bao di un DPS, den e caso aki, e scolnan a draai masha bon, tur cos tabata cana na ordo y no ta compronde kico ta e idea di e minister pa bay touch toch cu e totalidad aki.
Un splicacion
Den e fase cu tabata tin prome pa loke tabata e punto di independisacion, e minister duna tur hende tur sorto di splicacion y e no por a convence ningun hende pakico e kier haci e cambio aki. E unico cos cu Sneek a sinti cerca dje ta, cu e kier bay crea den e caso aki un monopolio pa su mes. El a bisa bon cla cu e kier indepens’e caminda cu e ta pone hendenan cu e ta apunta, cu e ta dicidi ken ta bay aden pasobra e hende cu ta bay eyden, mester por tin e mesun filosofia cu e minister. Si e no tin e mesun filosofia cu e minister, e no por ta eyden. Tambe e lo bisa cu e hendenan aki ta permanente, pa asina e garantisa cu si bin un cambio di gobierno, e pensamento di dje por keda den e instituto ey y sigui pusha su pensamento p’adilanti. Por mira cla e mentalidad. Nos tin un DPS cu hopi biaha ta haya discusion entre otro directivanan di scol cu ta sinti cu hasta DPS aki, den cierto cosnan tin miho cu e otronan. Awor aki ta busca manera pa hib’e atras, hib’e den un fundacion pa bay crea cosnan cu tin den otronan cu no kier mira. Esey ta di lamenta pasobra ta mira simplemente e minister aki kier crea algo pa e por bay luci, pa e por tin un stichting cu e por manda y por ta cu mañan cu e no ta minister mas, por dun’e un trabao eyden.
Obligacion di e minister
Sneek a splica cu ora duna e minister mocion, den e caso aki, el a wordo acepta. Si esaki no ta ehecutabel, e minister mester bisa esey. Sneek a agrega cu ta algo cu e no por haci. E tin cu gewoon cumpli cu e mocion y si e no cumpli cu e mocion, ta nifica cu e no ta duna respet na parlamento, na e organo cu ta control’e y ta keda na e organo si e ta keda den e funcion di minister si of no.
AVP tin 9 asiento. Un mayoria ta 11 asiento pa por tuma cualkier decision. E puntonan di AVP lo wordo treci dilanti y e mayoria lo mester dicidi kico nan lo kier haci cu e minister aki, cu no ta sigui e liña cu nan a pidi’e pa sigui.
Reunion
Pa por yama un reunion publico, mester tin minimo 3 firma. Y den e caso aki e fraccion completo a firma. Tin suficiente persona cu por firma pa pidi un reunion publico.
Ta keda den man di presidente si por yama e reunion, aunke ta den un periodo di receso, of e ta warda te ora e temporada di receso caba, e ta yama e reunion. Semper e ta den man di e presidente, ya cu e ta esun cu tin e agenda den su man, Sneek a bisa por ultimo.
