Diaranson mainta tabata e di ocho dia di tratamento di e presupuesto 2023. E anochi anterior Parlamento a aproba e suppletoire begroting di pais Aruba mas o menos 12:00 am. Diaranson mainta, Parlamento tabata falta solamente pa vota riba e mocionnan entrega y riba e ley di presupuesto 2023 mes. P’esey, mi a keda pasma, ora cu Marisol Lopez-Tromp di fraccion di MAS a lanta y duna su “stemmotivering” riba e diferente mocionnan y a desaproba mocion number dos. Mocion number dos, cual ta urgi gobierno pa presenta na Parlamento di Aruba e investigacion forensico andante den Serlimar, cual Marisol a bisa cu el a cuminsa dos aña pasa.
Marisol ta lubida kico el a haci na 2020
Un investigacion cu Marisol a propaganda y uza pa defende su “retiro inhusto” for di su puesto como minister na 2020. Pueblo ainda ta corda con el a grita cu tin yen di spirito den Serlimar y cos iregular severo cu ta pasando den e compania. P’e dianan largo Marisol a grita, defende, insulta y uza su immunidad parlamentario pa pone pueblo kere cu e tabata sincero den su postura y acusacion. Marisol a gaba e tempo ey cu el a laga investiga den Serlimar y a campaña rond cu ta ghostbusters e ta y cu e ta campeon den integridad. El a tira tur sorto di acusacion cu e pueblo di Aruba a confia y kere e tempo ey. Di e forma aki Marisol a crece di 400 pa 4000 voto den eleccion 2021.
Marisol a vota contra pa Parlamento haya e rapport di investigacion di Serlimar
Sinembargo ora cu e mester a vota pro pa un mocion cual lo empodera Parlamento di Aruba haya e rapport di e investigacion forensico aki, el a vota CONTRA! Awo con por ta cu bo a grita asina hopi tempo den Parlamento tocante investigacion y spirito y awo bo NO kier pa e investigacion aki cay den man di Parlamento di Aruba? Kico bo tin di sconde, Marisol? Kico bo NO kier pa pueblo haya sa for di e investigacion forensico aki? Awo Marisol su gritamento a resulta den un silencio masha grandi. Como parlamentario di pais Aruba m’a pone extra urgencia pa nos haya e rapport forensico aki, mirando e postura sumamente preocupa y accion contradictorio di Marisol Lopez-Tromp.
Pa basta tempo caba mi a bin ta denuncia su modus operandi, cu semper e ta contradeci loke e ta bisa, pasobra e no ta sincero den su accion y expresionnan. Pueblo por wak e video di Parlamento di Aruba di dia 16 di november mainta. E ta cortico y pueblo por wak y scucha pa su mes con Marisol ta contradeci su mes, desaprobando e mocion y con mi ta expone su hipocrecia.
