Diahuebs Aruba Methodist Circuit a ofrece un conferencia di prensa pa informa tocante un subasta silencioso cu ta bay tin na beneficio di e programa di Meals On Wheels cu actualmente ta sin wheels pasobra nan van di distribucion a daña. Cada diamars y diabierna, cu ayudo di chef y otro boluntario, ta cushina, paketa y entrega cuminda cayente. Solamente durante e lockdown mester a stop pa algun siman, pero fuera di esey a keda activo durante e pandemia.
“Tin hopi necesidad na Aruba y nos ta purbando pa yega na un total di 82 famia beneficia,” asina Sue Faulkner fundado di e grupo a duna di conoce. Nan ta den necesidad desespera pa Meals on Wheels pasobra nan tabatin un van pa hopi tempo, pero cu no ta traha mas. Iglesia a permiti uza nan van cu tambe ta bieu y tin poco problema. Door di hopi di e boluntarionan ta uza nan mesun auto. “Nos mester di un vehiculo y pesey nos ta bay tin un Subasta Silencioso.”
A sigui splica cu ta algo maraviyoso caminda varios negoshi di Aruba tabata generoso den ofrece articulo. E subasta lo ta dia 26 di november di 4’or pa 7’or y mey di atardi na John Wesley Auditorium na San Nicolas. Adicionalmente lo tin un bon cushina cu platonan manera calacuna, curry chicken, pisca henter hasa, pasaboca y sopinan.
Un subasta silencioso ta un evento leuk caminda tin certificado pa 50 florin, bo ta haya un carchi caminda bo ta pone bo nomber y cuanto bo ta ofrece pa e certificado. Un hende lo bisa 30, otro 40 y otro 50. Pa 7’or y mey di anochi ta clausura e subasta y e bid/oferta mas halto ta bay cu ne.
Ta bay tin diversion pa un y tur, articulonan cu ta bon como regalo pa pasco. Tin certificado pa dentista, pa chiropractor, etc. Tin hopi pa tur hende y atrobe ta na beneficio di pueblo di Aruba. Si ta desea di duna placa, por haci esey tambe pa medio di e cuenta na Aruba Bank. Si bo no por ta presente na e subasta, pero kier yuda toch, esaki ta e miho manera. E number di cuenta ta: 2019966 pa The Aruba Methodist Church Foundation Meals on Wheels program y 2019966 The Aruba Methodist Church Foundation.
