Conhuntamente cu Futura e team di Maria College a organisa un feria di ciencia virtual pa di tres aña consecutivo.
Cada grupo di ciclo-avansa 1 mester a traha un video den cual nan ta splica nan investigacion of invencion y subi esaki den Google Classroom. Fuera di e video nan mester a entrega un relato pa e materia di fisica.
Cinco hurado a selecciona e tres miho investigacionnan.
A invita e ganadornan (e tres miho gruponan) riba diabierna, 5 di maart 2021. Na prome luga: “The Dexters” (Brandon Farro- Aidan Ras- Andy Perez & Norby Leon di klas 3B) cu nan invencion di hydro-energia.
Di dos lugar tabata pa e grupo di 3G (Ariadna Contreras- Valerie Curiel- Nicole Mendez- Valeria Zumaraga) cu e tema ECO-muur, recicla door di plastic. Y na di tres luga pa e grupo di 3H (Therron Wijman- Isabella da Silva- Libys Willems & Neyline Reyes) zuurgraad (pH) di differente awa cu ta obtenibel na Aruba y e relacionan cu esaki tin cu cancer.
E resto di studiantenan a volg e anochi via livestream. Directiva di e scol ta gradici di curason na e sponsornan cu a sa di brinda nan aporte na e feria di ciencia aki, cual nan ta WEB Aruba NV, The Movies y Dyon Center.
Maria College Mavo ta un scol secundario cu ta implementa tareanan practico. Ta científicamente comproba cu un studiante ta siña mas door practica, en bes di solamente siña materia a base di teoria.
