E accion aki ta uno caminda Polis, Kustwacht y Guarda Nos Costa hunto a hit un boto. Ta trata di e boto Moralito cu a ser capta pa e Radar Kamer di polis. Asina a bati alarma y activa polisnan na tera pa bay mesora na e areanan conoci den Sero Colorado pa spera e yegada di e boto na tera.
Mientrastanto a avisa Kustwacht tambe cu a sali pura cu nan boto Metal Shark direccion na e parti Oost. E personal di Radar Kamer a guia e boto di Kustwacht cu a yega riba e boto Moralito prome cu el a yega tera. A sorpresa e boto y cende luz riba nan. Abordo tabata tin 11 persona. 10 homber y un muhe tabata abordo di e boto.
A bay cu nan direccion di e base di Kustwacht. Eynan a separa e capitan cu e helper for di e resto di e grupo cu lo a paga pa bin Aruba cu e boto Moralito. E capitan y e helper a pasa nan pa polis cu ta sigui cu e investigacion pa Mensen Handel cu Mensen Smokkel. E otro personanan a pasanan pa Guarda Nos Costa cu a presenta cu nan van y hibanan tur na ex FOL. E combinacion di Polis di caya, Radar Kamer, Kustwacht y Guarda Nos Costa ta e combinacion perfecto pa asina intercepta e operacion ilegal cu botonan cu ta treciendo ilegalnan Aruba.
