Riba red social a tuma cu dr. Marck Oduber ta representando region den un foro internacional grandi internacionalmente. Nos a tuma contacto cu ne y el a confirma cu actualmente e ta na e oficina principal di IOC/UNESCO na Francia. Ey ta tumando luga e di 32 sesion di e asamblea general di e Comision Oceanografico Intergobermental (IOC) di UNESCO. IOC-UNESCO ta e instancia di Nacionnan Uni encarga di apoya ciencia y servicionan oceanico na nivel mundial.
Diabierna mainta Marck Oduber a haci un presentacion como presidente di comite di directiva di IOCARIBE. E presentacion tabata pa duna un update na paisnan miembro di e trabounan di IOCARIBE y pa pidi aprobacion pa e tareanan/plannan den e periodo 2024-2025. IOCARIBE ta e representacion di IOC-UNESCO pa e region cu ta inclui, Merca te Brazil.
Parti di e presentacion a tabata un update riba ciencia oceano y riba e plannan pa bin cu un oficina regional di coordinacion di oceano na Colombia. E oficina lo yuda coordina y implementa e plannan miho den Caribe. IOCARIBE lo yuda paisnan tambe cu nan capacidad pa haci observacion maritimo.
E aumento den e capacidad di observacion lo yuda formula alerta trempan. A informa tocante alganan peligroso y sargassum cu ta sigui di ta un problema pa Caribe. IOCARIBE lo bin cu un sistema di alerta trempan regional pa esaki.
A informa tambe tocante derame di petroleo y unda Trinidad & Tobago ta e unico pais den Caribe cu a obtene training di Merca pa analisa posibel derame y pronostica su movecion via satelite y ataves di modelonan. IOCARIBE lo coordina cu Merca pa nan train otro paisnan den Caribe tambe.
Paisnan miembro a bay di acuerdo tambe pa IOCARIBE prioritisa participacion di SIDS (paisnan chikito den desaroyo) den IOC, hobennan den e area di ciencia marino y yuda paisnan bin cu nan comision di decada pa oceano. Na final di e presentacion di dr. Marck Oduber na paisnan miembro, a aproba e plan di IOCARIBE pa e periodo 2024-2025.
