Museo Arkeologico a cuminsa cu e di dos fase di ‘field school.’ Nan a finalisa e parti di veld y awo ta cuminsa controla. Nan a busca artefacto na Bringamosa, cual sitio ta esun mas bieu.
Harold Kelly, arkeologo Museo Arkeologico Nacional Aruba, a splica cu nan a finalisa e parti di veld y nan a habri dies test pit. Den e tres simannan aki e cuater studiantenan cu a yuda Kelly a habri ocho test pit. Esakinan tabata buraco di un pa un. A habri e buraconan n’e sitio pa mira ki material nan ta haya y ki rastro por topa cu ne.
Durante e tres simannan aki, nan a topa cu material interesante, tambe a haya cierto situacion cu nan no por a saca nan mes afo pero nan a logra. Awo e tin un miho idea di e sitio arkeologico Bringamosa cinco, ki tipo di material ta haya eynan, ki tipo di actividad tabata haci. Tambe e tin un miho idea di ki tipo di funcion e sitio aki tabatin den pasado.
Nan a traha na rooi di Bringamosa. E sitio aki ta uno arcaico, cu ta di e prome grupo cu a yega Aruba cu ta un di e luganan mas bieu. E fecha ta di mas o menos 1500 prome cu Cristo, esta mas o menos 3500 aña pasa. Esaki ta e prome luga cu nan a haya ta in land, esta tera aden. E hendenan cu a bin fo’i tera firme sea di Venezuela of costa di Caribe Colombiano a yega Spaans Lagoen. Via Spaans Lagoen nan a bay paden y explota e recurso eynan, unda via e rooi di Bringamosa nan a explora e isla.
Kai Tjong-Ayong, studiante di Leiden University, a haya hopi dibertido cu nan por a coba den sitio arkeologico Bringamosa cinco den e ultimo simannan. Tur e dianan aki tabata uno di enseñansa y garamento di experencia. Esaki tabata su di dos biaha cu e ta riba veld. Nan tabata den e proceso di laba e artefactonan cu nan a haya. E ta haya esey algo dibertido.
Tur dia nan mester a lanta trempan pa bay Bringamosa unda nan tabata keda como cinco ora. Nan tabata traha den e solo y calor bisti cu paña largo pa evita cu nan no ta kima. E trabou ta hopi fisico, nan tabata coba y cada pida coba ta di dies centimeter. Nan a haya hopi material di cocolishi, incluso weso. A haya artefacto ceramica entre otro.
Pa mas lesa TREMPAN.COM.
