BON NOTICIA, Tin hopi pero masha hopi oportunidad pa lanta economia di Aruba y asina trece pan y bienestar den cas di Famia, di berdad hopi, y nan ta den nos alcance , pasobra e oficina di bendicion di Dios no a sera, ni tampoco e ta traha via un App. Nos mester consulta Dios.
Tur mayor mester consulta Dios pa asina nan haña guia y direccion pa nan famia.
Por ta bo pensa cu mayor tambe tin mester di guia? Si mayor mester di guia , pasobra sin guia di Dios un mayor no por funciona optimal pa asina educa, disiplina, coregi su Famia. Corda bon cu un mayor no tin derechi di maltrata. Pero si tin un deber sagrado di coregi su yiu. Kico ta nifica consulta Dios? Esey ta nifica , pone Orguyo un banda,pone bo mes manera di haci, bo mes plan , y dobla bo rudia, y haci oracion na Dios , y alcansa Su Atencion, pa asina bo por haña guiansa pa bo famia. Si den pasado hende no tabata por sin Dios awor aki ta peor, aunke con modernisa mundo ta , Dios ta keda cu mesun poder sinta den su trono, caminda e tin dominio riba tur cos hasta riba e diabel.
Beibel ta mustra nos con Homber nan di Dios, Lider, Rey , Profeta , y hasta e propio Hesus Cristo a consulta cu su Tata den hofi di Getsemani y tur cos a sali bon.
Moises a consulta cu Dios y tabatin exito.
Abraham a consulta cu Dios y tabatin exito.
David a consulta cu Dios y tabatin exito, y no lubida cu dia e no a consulta David a cay den pica.
Salomon a consulta cu Dios y tabatin exito, pero e tambe a mira y sinti e diferencia ora cu e no a hacie.
Josafat a consulta cu Dios y tabatin exito.
Ezequias a consulta cu Dios y tabatin exito.
Asa a consulta cu Dios y tabatin exito.
Elias a consulta cu Dios y tabatin exito.
Eliseo a consulta cu Dios y tabatin exito.
Josue a consulta cu Dios y tabatin exito.
Gideon a consulta cu Dios y tabatin exito.
Mayoria di e persona ariba menciona tabata tata di Famia.
Aki nos por mira cla cu consulta cu Dios no ta cos di awor , pero tur hende cu kier ta mas responsabel y tin vision ta consulta cu Dios. Hopi di e hombernan aki tabata rico, tabtin placa propiedat y ehercito, pero toch nan tabata consulta cu Dios, y scucha caul ta Dios su boluntad pa nan bida y nan famia.
Awendia hopi biaha bo ta tende mayor a faya, no ta pasobra e no a bay scol of no tin placa, sino pasobra e no a consulta cu Dios prome cu e tuma su decision. Ki ora nos mester consulta cu Dios? Tur ora nos mester consulta cu Dios. No haci nada riba nos mes, pasobra si nos mes tabata por, nos no tin mester di Dios. Pone tur plan , tur proyecto, den su man, pasobra esey ta Victoria sigura, despues ningun hende no por tira nada na bo cara, y bo yiunan lo ta agradecido na e bon decision cu bo a tuma, bao di Guia di Dios y su Spirito santo, y di e forma ey henter Famia a keda bendiciona.
Prome cu un hende traha un cas e mester calcula e gastonan, awel prome cu bo yega asina lew pone tur cos den man di Dios , consulta cune , y hasta locual cu mester sali bo caro, lo sali mas barata.
Ora bo ta den perta, y bo no sa con haci, tin biaha bo no sa di unda e proximo plato di cuminda ta bini, por favor consulta cu Dios, no haci nada cu por daña bo nomber y pone bo integridad na peliger, no haci nada pa otro hende bira miyonario y abo ta perde bo libertad.
Si bo ta hoben y bo ta bay casa, consulta cu Dios, pasobra ningun hende no ta casa pa divorcia, tur hende ta casa pa Felicidad, y ora bo consulta cu Dios e lo drecha tur cos den e matrimonio segun su boluntad.
Orguyo ta pone hende kere cu ta nan ta manda, poder ta haci hende ciego, Envidia ta haci hende vengativo, Diabel ta pone hende gaña, pero un consulta cu Dios ta haci bo mas cu Vencedor, y bo cas y abo lo ta contento.
Den kico cu bo por ta pasando por favor consulta Dios, pasobra Dios nunca lo laga bo bandona.Su promesa ta berdad y su palabra nunca ta faya.
Sinceramente
Pastor
Marcel Balootje.
