Stakeholdernan di sector di cuido medico a reuni cu Parlamento awe. Cada stakeholder a trece nan punto di bista dilanti pa loke ta e cortamento di gasto cu 5 miyon florin pa luna den sector cuido medico.
Sindicato ABV tabata hopi contento cu sector di cuido por a expresa nan mes na Parlamento, unda a splica kico e cortamento ta nifica pa e sector aki. Como sindicato cu ta representa mayoria di e trahadonan den sector di cuido, a mustra e efectonan riba e mesun trahadonan.
El a probecha pa mustra cu awo e situacion ta empeorando, cu cifra di casonan positivo aumentando. Aruba ta bayendo pa un aña den lucha contra COVID. E ta un presion enorme riba cada traha y mester bini cu solucion pronto. Esaki no ta corta vet so, pero ta corta e aorta, unda cuido completo ta sangrando. Ta yega momento cu no por duna e cuido adecuado, cu tur e cortamentonan aki.
Tur fraccion a mustra di ta compronde y ta apoya e proecupacion di e veld di cuido. Nan ta kere cu salud ta keda na prome luga y mester busca solucion. Asociacion di Boticario a bati alarma caba pa introduccion di un lista positivo nobo, unda hopi remedi no ta wordo cubri mas y cual tin consecuencia pa pueblo. “A yega momento pa pueblo tambe sali y para pa su derechonan. Pueblo ta esun cu ta wordo perhudica. Tur hende mester para hunto pa Hulanda para esaki, pasobra e situacion no por sigui asina.”
Na final el a bisa cu e mensahe aki mester yega bon cla cerca Hulanda.
