Den un carta fecha 12 di juni 2026 dirigi na Fiscal Mayor di Ministerio Publico, Parlamentario Mike de Meza y su casa Brigitte de Meza-Every ta nenga e proposicion di fiscal pa yega na un acuerdo pafo di corte. Despues di un evaluacion cuidadoso, nan ta informa cu nan no por acepta e propuesta aki.
Den e propuesta ta haci referencia, entre otro, na e alegacion cu no a entrega declaracion di impuesto na tempo. Sinembargo, no ta tuma na consideracion cu a entrega tur declaracion finalmente y cu Servicio di Impuesto a tramita tur te cu nan a resulta den aanslagnan definitivo. Ademas, Director di Impuesto a confirma durante tratamento den corte cu el a ricibi y a procesa e declaracionnan di impuesto. Tambe ta cla cu por papia aki di “verjaring”, por lo menos en cuanto ta trata di e sospecha basa riba articulo 68, prome lid, di e Algemene Landsverordening Belastingen.
Basa riba esaki, señor y señora de Meza no ta compronde riba ki base ainda ta uza e alegacion aki como fundamento pa procesamento penal.
Tampoco nan no ta di acuerdo cu e alegacion di a haci declaracionnan di impuesto intencionalmente incorecto of incompleto. Riba base di e datonan suministra, por determina e impuesto corecto y a determina e impuesto ey efectivamente. No tin ningun entrada of capital scondi, ni tampoco tin un perhuicio fiscal estableci.
Teniendo na cuenta tur loke ta menciona anteriormente, señor y señora de Meza ta di opinion cu e propuesta di transaccion ta basa riba suposicionnan falso cu nan no por sostene. Pa e motibo ey, nan no por acepta e propuesta.
