Un di e scolnan cu a duna resultado diahubes, tabata Filomena College na San Nicolas. Den e prome periodo 71% di nan alumnonan a gradua.
Raquel Lampe, directora di e scol a indica cu e aña escolar tra’i lomba tabata un di hopi reto. Y e ta kere cu no ta nan so, pero tambe di hopi otro scol. Pero asina mes, nan ta super contento cu 55 alumno a slaag den e prome periodo di 77 alumno. Esaki ta bon pa 71% y ainda nan tin ocho alumno cu tin un chens ainda den di dos periodo. Pues, nan e porcentahe tin chens ainda di subi.
Como scol, hunto cu e alumnonan y nan mayornan, nan a pusha duro pa asina por celebra e logro di tur e alumnonan cu a logra pasa. Ainda 8 di nan tin chens di pasa y esunnan cu no logra, lo sigui un aña mas. Si e cantidad di porcentahe di graduado ta menos cu aña pasa y esaki ta algo na nivel nacional. Tin hopi cos cu ta hunga un factor, cu ta haci cu e muchanan ta menos concentra.
Mester bin cu cambionan hopi lihe den nos sistema di educacion. ta tratando cu generacion di alumnonan cu pensamento nobo y forma di siña diferente, cu e sistema tradicional no ta funciona mas pa nan. Scol ta trahando caba riba esaki pa cuminsa for di mas jong, for di klas 1 te cu 3, pa prepara e muchanan di otro forma, riba ‘Project Based Learning’. E docentenan ta preparando nan mes caba pa dos aña door di haci diferente curso y tayernan. E docentenan ta na caminda pa deal cu retonan cu un generacion cu ta pensa y traha diferente, mester topa cu nan.
E reto mas grandi cu e educador di awendia tin, ta red social y e telefon. Esaki ta algo cu ta pensando seriamente pa e proximo aña escolar, pa adapta nan reglanan di scol y cierto cosnan di scol. A ripara cu red social, gaming ta un distraccion masha grandi pa e muchanan. Mester haci algo pa nan socialisa bek, ya cu riba telefon nan ta swipe y bay, mientras cu den klas, nan no por swipe y hala e docente un banda.
A pesar di tur esakinan, como scol nan ta sumamente contento di nan logro.
