Yirani Berg tin 33 aña biba na Hulanda, despues cu el a muda pa Hulanda na un edad hopi jong y e ta comparti algun tips pa e studiantenan.
A pesar cu e tin mas di tres decada bibando na Hulanda, nunca el a lubida su idioma, aunke cu su mama ta un persona cu ta papia Spaño. El a conta cu su mama a stima Papiamento asina hopi, cu el a siña papi’e manera un nativo y esaki, despues cu nan a bay biba na Hulanda, el a pas’e over pa su yiunan, cu a sigui papia Papiamento na cas.
El a conta cu el a caba su scol basico y scol secundario na Hulanda y despues el a traha como stewardess di KLM, pero semper e tabata kier a trece e idioma di su mama dilanti, pa cual el a tuma e decision di bay studia pa juffrouw di scol di Spaans. Na Europa, e idioma Spaño ta hopi “in” actualmente na Europa.
Nos colega Eduardo Goeloe a combersa cu Yirani, tocante e tipsnan pa e studiantenan cu ta bay Hulanda pa sigui cu nan estudio superior. El a indica cu ta hopi importante pa mescla nan mes cu e Hulandesnan, integra den e cultura Hulandes, adapta bo mes n’e sistema di Hulanda. Asina tur cos lo bay bon.
Ainda Yirlenis tin conexion cu famia di su tata na Aruba y tempo cu e tabata stewardess, regularmente e tabata na Aruba, pero awo cu e ta docente, e ta depende di e vakantie di scol, ya cu e tin un yiu chikito awo. E ta spera di por bishita Aruba otro aña.
RETO
mirando cu Yirlani a bay Hulanda chikito, e reto mas grandi tabata e hecho di cuminsa di nobo, den un pais cu no conoce. Pues, e momento cu nan a bin biba na Hulanda y esey tabata un cambio grandi, e idioma a hunga un rol grandi. Pero na scol el a haya un ‘apoyo’ na scol cu a yud’e hopi cu e idioma.
Hulanda tin un cultura dominante y ta bon pa adapta na e cultura aki. Hopi biaha e studiantenan ta bay Hulanda cu e pensamento cu na Aruba nan ta haya les na Hulandes, pa loke ta skirbimento y lesamento. Sinembargo, e papia Hulandes ta keda un poco dificil pa hopi di e studiantenan, cu ta haya dificil pa adapta na e idioma Hulandes.
Mas aleu, Yirani a conseha pa e studiante uni su mes na un Studentenvereniging y di e manera ey, e studiante ta adapta su mes mucho mas lihe n’e bida, idioma y sociedad Hulandes. Esey ta e manera mas lihe y practico pa domina e idioma y siña palabranan cu nunca antes tabata conoce.
