Relaciona cu e intencion di Gabinete Wever-Croes II pa laga haci un investigacion relaciona cu trato igual na tur grupo den comunidad, a causa cu por lo menos un miembro di Parlamento di Aruba, den representacion di e Fraccion di MEP, esta Marco Berlis, a lansa no menos cu bintidos pregunta na Minister Geoffrey Wever.
E parlamentario kier pa Minister Geoffrey Wever splic’e, cu den e presupuesto di aña 2024, na pagina 73, minister ta papia di e tema gelijke behandeling. Minister ta menciona cu lo haci un “inventarisatie” riba tereno con discriminacion ta impone limitacionnan riba desaroyo y participacion den diferente grupo di ciudadano cu ta forma un minoria den nos sociedad. Como ehempel minister ta menciona stranheronan cu a imigra pa Aruba y e grupo LGBTQIA+. Cua otro grupo mas lo ta inclui den e investigacion/inventarisatie aki?
Tambe e parlamentario di MEP kier pa e minister di Raiz splic’e di ki forma lo haci e “inventarisatie” aki? Pa e duna un splicacion detaya ki metodonan lo uza pa por haya e informacion y data corecto di e discriminacion actual? Kier sa e nomber di e compania of organisacion cu lo haci e inventarisatie aki y tambe cuanto tempo e investigacion aki lo tuma.
Aunke ta bay haci un assessment, e parlamentario ta sinti cu ya Minister Wever ta menciona cu lo traha riba programanan educativo y di conscientisacion pa combati tur forma di discriminacion. Ta pidi anto pa e minister duna un lista di “tur” e formanan di discriminacion cu ta wordo referi na dje. E kier sa si lo tin formanan di “discriminacion” cu lo haya mas atencion cu otro, of tur di nan lo haya e mesun atencion, educacion, conscientisacion y promocion di gobierno?
Minister Geoffrey Wever ta menciona cu e programanan di educacion y conscientisacion aki lo wordo traha y desaroya pa e mesun gruponan minoritario aki pa asina nan bos wordo scucha. “Mi ta keda confundi, pasobra prome minister ta bisa lo bay haci un inventarisacion, pa despues yega na un conclusion y plan van aanpak. Pero ta parce cu tur cos a wordo defini caba. Esaki ta corecto?”, esey Parlamentario Berlis kier sa di Minister Wever.
Mas leu e ta puntra si gobierno lo bay paga pa tur gasto di e investigacion y di e programanan? Cuanto a presupuesta pa traha riba e programanan aki? Na unda y na ki audiencia lo produci e programanan contra discriminacion? Mirando cu bo ta menciona e grupo minoritario di migrante y LGBTQIA+ so, ta duna e impresion cu esakinan tin e enfoke mas grandi. Pesey Berlis kier pa Wever por clarifica si esaki ta corecto.
E fraccion di MEP den Parlamento kier pa Minister Geoffrey Wever splica bon si den su investigacion contra discriminacion, si lo investiga tambe e agenda, desaroyo y consecuencia di e movemiento LGBTQIA+ ta causando na Merca, Europa, Canada, Sur y Centro America y hopi otro luganan prome cu lo duna un aprobacion definitivo? Tambe MEP kier ta sigur cu si Minister Wever lo controla e contenido di e programanan educacional cu lo keda den man di e grupo minoritario, prome cu comparti esakinan cu pueblo. Lo uza Setar y TeleAruba pa e iniciativa aki?
Pero Berlis kier sa tambe si Minister Wever lo brinda oportunidad tambe na otro gruponan cu no ta riba e lista di grupo minoritario, pa evita tur forma y sorto di discriminacion? MEP kier sa ken ta aproba e lista di grupo minoritario y con nos por ta sigur cu no ta laga ningun grupo minoritario afo.
Marco Berlis a subraya e echo cu 18 mil hende a firma den poco tempo pa protega nos muchanan di LGBTQIA+. E realidad ta cu den poco tempo a logra acumula e cantidad di firma aki. Esaki ta haci e tema aki hopi sensitivo y debatibel. Pesey Berlis ta puntra ki beneficio moral y educativo tin den promove e agenda di LGBTOIA+ mirando con nan ta maneha immoralidad sexual? E kier sa si Minister Geoffrey Wever ta na altura kico grooming ta y kendenan ta wordo targeted. Si e mandatario por ta na altura di Drag Queens y con presentacionnan na muchanan di 3 aña bay ariba ta algo normal caba na Merca? MEP kier sa si Raiz ta haya esaki algo aceptabel pa Aruba y si Wever ta di acuerdo cu nos muchanan mester bira un target pa inmoralidad, pedofilia y grooming?
Parlamentario Berlis a puntra Minister Geoffrey Wever si e sa cu algun luna pasa tabatin un presentacion di “E cashi magico” cual tabata un presentacion di LGBTQIA+ na muchanan chikito riba temanan homosexual y cu esaki a sosode sin permiso di e mayornan, cu despues a expresa hopi disgusto y desaprobacion. Ta pesey MEP kier sa pakico e ta asina necesario pa e “bosnan” di LGBTQIA+ wordo scucha?
“Nos por scuch’e y mir’e diariamente riba facebook, tik-tok y otro plataformanan. Mi ta sigur pueblo ta na altura di nan agenda, intencionnan y nan agenda di identidad di genero”, asina Parlamentario Marco Berlis a termina bisando. E ta spera di por tende pronto y haya un contesta por escrito di Minister Geoffrey Wever riba tur su preguntanan, observacionnan y critica riba e tema aki di scucha bos di gruponan minoritario den comunidad.
