Un yamada urgente y desespera pa ayudo y un testimonio desgarrador di un mama cu no por mas. Ermelyne Hoevertsz a dicidi di kibra silencio y papia abiertamente tocante e pesadilla cu e y su famia ta pasando aden debi na e problema di adiccion y salud mental di su yiu homber, Brian. Entre lagrima, angustia y e miedo constante pa su propio bida, e mama aki ta pidi instancianan concerni pa interveni prome cu un tragedia tuma luga.
E historia di Brian ta uno cu a bay ta empeorando den transcurso di tempo. Despues di tabata un periodo liber di uzo y den bon caminda, e caida a bini acompaña pa un estado di psicosis y agresividad extremo. E detayenan di su comportacion den e ultimo lunanan ta mustra e gravedad di e situacion y e peligro directo den cual e famia ta biba diariamente.
Detayenan cu ta hinca e famia den teror
Segun señora Hoevertsz a relata, e casonan di violencia y destruccion a escala na un nivel alarmante:
Destruccion di propiedad: Den su episodionan di agresion, Brian a yega di kibra tur e bentananan di e cas y a destrui rond di shete auto, kibrando nan bentana y dobla nan totalmente.
Benta di tur pertenencia: Pa por financia su adiccion, Brian a bende tur su pertenencianan personal, incluyendo tur su hermentnan di trabou, welder, speaker y telefon, te cu el a keda sin nada.
Menasa directo di morto: E estado di psicosis a hib’e na menasa su propio tata di morto repetidamente. E famia tin grabacionnan di audio unda ta scucha claramente e menasanan aki.
Entrada anochi cu arma: Den un di e episodionan mas terorisante recientemente, Brian a drenta cas den oranan di marduga cu un bat den su man, exigiendo placa pa gasolin y menasando e mama directamente mientras e tabata hinca den e cuarto, obligando e mama pa pidi ayudo y duna e placa p’e bay.
Comportacion “demonisa”: E mama ta describi cu e yiu cu e tabata conoce no ta existi mas den e momentonan ey; e ta transforma completamente, cu un rabia excesivo y un actitud cu e mama ta yama “demonisa”, sin ningun tipo di spanto of muestra di respet pa su mayor o famia.
Bibando den angustia constante
E situacion na cas di señora Hoevertsz a bira un zona di peligro constante. E famia no por drumi na paz, sabiendo cu cualkier momento un episodio di violencia por ripiti. A pesar cu e tata a haci denuncia y cu Recherche y Polis a interveni—hibando e yiu te hasta pa cumpli 30 dia di detencion—e problema di fondo no ta keda resolvi. Un biaha cu e sali bek na libertad sin un tratamento obligatorio, e circulo vicioso di adiccion, agresion y psicosis ta bolbe cuminsa.
“Nos no por biba den e angustia aki mas. Nos tin mucha chikito y hende grandi den cas cu ta bibando den teror. Mi a yega na un punto caminda mi ta teme seriamente pa mi propio bida, pasobra e menasanan y e comportacion ta birando mas peligroso cada dia,” señora Ermelyne a expresa.
Un yamada na instancianan y gobierno
E mayor preocupacion di e mama aki ta e falta di un luga pa intern’e of un programa di rehabilitacion a largo plaso (manera e centro di CADA/CEA cu tabata existi antes) cu por tene Brian afo di caya y ricibiendo e tratamento medico y psicologico cu e mester. E experiencia cu centronan di ayudo cu a cera nan porta of cu no tin cupo pa ricibi casonan asina abrumador, ta laga famianan den un desesperacion total y den peligro constante.
Señora Hoevertsz ta haci un yamado urgente na Minister di Husticia, instancianan di salud mental, Respaldo, y tur organo competente pa nan tuma e caso aki na serio. E no ta pidi ayudo solamente pa salba bida di su yiu cu ta perdi den adiccion, sino tambe pa proteha e integridad y bida di henter su famia prome cu ta demasiado tardi.
Pa cualkier instancia of persona cu por brinda ayudo directo of orientacion den e caso aki, señora Ermelyne Hoevertsz ta habri pa ricibi e sosten necesario pa por haya un solucion definitivo pa e drama familiar aki.
